Kuri Sitasiyo ya Nyamata mu Karere ka Bugesera, Urwego rw’Igihugu rw’Ubugenzacyaha, RIB, rwasubije abaturage batandukanye telefone ngendanwa zigera kuri 140 zafashwe mu bihe bitandukanye zaribwe n’abantu banyuranye, zifite agaciro k’asaga miliyoni 40 z’amafaranga y’u Rwanda (40,760,000 Frw).
Igikorwa cyo gushyikiriza abaturage telefone zabo zari zaribwe, cyabaye kuri uyu wa Gatanu tariki 19 Kamena 2026.
Nyuma yo gutanga izi telefone kuri ba nyirazo, Umuvugizi wa RIB, Dr. Murangira B. Thierry, yasabye abagura terefone kugira ubushishozi ngo kuko haba harimo n’izibwe zikajyanwa kugurishwa, agaragaza kandi ko iyo telefone ifatanwe uwayiguze, ari we uhomba, ndetse kimwe n’uyicuruza yarayiguze n’umuntu wayibye.
Yagize ati: “Mbere yo kugura telefoni yakoze ukwiriye kubanza kumenye iyo telefoni uyigurisha ari nyirayo, naho ubundi igihombo kizakujyaho.”
Dr. Murangira yongeye kwibutsa kandi abakishora mu bikorwa by’ubujura ko bakwiriye kubireka ngo kubera ko bazakomeza gukurikiranwa ndetse ko bazajya bafatwa uko byagenda kose.
RIB kandi yatanze ubutumwa bwibutsa abaturage bose kurinda ibyabo, kujya bakemura amakimbirane biyambaza inzego zibishinzwe aho kwihanira ndetse no kwirinda kugurira telefone ahatizewe.
Muri iki gikorwa cyabereye mu Karere ka Bugesera kuri sitasiyo ya RIB ya Nyamata, hanerekanywe kandi abantu 10 barimo abakekwaho ubujura bwo kwiba telefone n’abandi bakekwaho ubwicanyi buturutse ku mpamvu zitandukanye, zirimo amakimbirane yo mu miryango ashingiye ku mitungo, kwihanira ndetse no gucana inyuma.
