Imibare y’Urwego rw’Igihugu rw’Ubugenzacyaha-RIB igaragaza ko ihohoterwa rikorerwa abana rikomeje kuba ikibazo gihangayikishije mu Ntara y’Iburasirazuba, aho mu mezi atatu ashize ni ukuvuga kuva mu Ukuboza 2025 kugera Gashyantare 2026 hagaragaye ibyaha 342 by’abana basambanyijwe.
Muri iyo mibare, igaragaza ka Akarere ka Rwamagana ariko kaza ku isonga n’ibyaha 77, kagakurikirwa na Nyagatare ifite 66, Kayonza ifite 52, Gatsibo ifite 45, Bugesera ifite 44, Kirehe ifite 34, mu gihe Ngoma yo ifite 22.
Iyi mibare yerekana ko ikibazo cy’ihohoterwa rikorerwa abana gikomeje gufata intera mu turere dutandukanye two mu Ntara y’Iburasirazuba, bigasaba ko inzego zibishinzwe, ababyeyi n’abaturage muri rusange barushaho gufatanya kugira ngo gikumirwe.
Gahamanyi Emmanuel, ukuriye Ubushinjacyaha ku Rwego Rwisumbuye rwa Nyagatare, yavuze ko hakiri abantu bahishira ihohoterwa rikorerwa abana, barimo n’ababyeyi, ibintu bituma rikomeza kwiyongera.
Yagize ati: “Hari abantu bagihishira ihohoterwa kandi barimo abayobozi, ukibaza ubu turakorera Igihugu kimwe cyangwa harakora ibihugu bibiri.”
Yakomeje agira Ati: “Ibi rero nitudahagurukira rimwe ntabwo bizacika. Njye numva abahohotera abana ari abanzi b’Igihugu, kuko si nibaza umwana w’imyaka 17 na 16 arahetse, ubu se byagiye kumenyekana bigeze bite? Nitudafatanya nk’inzego n’ababyeyi ntabwo ibi bintu bizacika, ari nayo mpamvu mubona imibare igenda izamuka.”
Yashimangiye ko hakenewe ubufatanye bw’inzego zose n’imiryango, kugira ngo ihohoterwa rikorerwa abana rihashywe burundu, cyane cyane binyuze mu gutanga amakuru ku gihe no kudahishira abakora ibi byaha.
Ingingo ya 133 y’Itegeko nimero 68/2018 ryo ku wa 30/08/2018 riteganya ibyaha n’ibihano muri rusange, nk’uko ryavuguruwe kugeza ubu, ivuga ko umuntu usambanyije umwana uri munsi y’imyaka 14 ahanishwa igifungo cya burundu. Nanone kandi, usambanyije umwana agakurikiraho kubana na we nk’umugore cyangwa umugabo, kimwe n’umusambanya akamwanduza indwara zandurira mu mibonano mpuzabitsina, na bo bahanishwa igifungo cya burundu.
