Umunyamabanga wa Leta muri Minisiteri y’ubuhinzi n’ubworozi, Dr.Uwituze Solange, yasabye abatuye i Nyagatare kwiga no gushyira mu bikorwa umuco wo guhunika imyaka baba bejeje, aho kuyimarira ku masoko yose, ibintu bishobora kubateza inzara mu gihe baba barumbije cyangwa habaye ibihe bikomeye.
Ibi yabigarutseho kuri uyu wa Gatandatu, ubwo yifatanyaga n’abaturage bo mu Murenge wa Rukomo mu muganda rusange usoza ukwezi kwa Gashantare 2026, aho hatunganyijwe umuhanda ureshya na kilometero enye washyizwemo laterite hagamijwe koroshya ingendo.
Mu butumwa yagejeje ku baturage bari bitabiriye umuganda, Dr. Uwituze yavuze ko guhunika umusaruro ari imwe mu nkingi zikomeye zo kwihaza mu biribwa no kurinda imiryango kugerwaho n’inzara.
Yagize ati; “Hari aho usanga abaturage bejeje neza, ariko kubera kwihutira kugurisha byose ku masoko, bakabura icyo basigarana. Ibi bituma mu gihe cy’izuba cyangwa igihe habaye ikibazo cy’isarura, bahura n’inzara. Turabasaba kwiga umuco wo guhunika, bakagira icyo basigarana cyo kugaburira imiryango yabo”
Dr. Uwituze kandi yashimye uruhare rw’abaturage mu muganda, avuga ko ari ishingiro ry’iterambere rirambye no kwishakamo ibisubizo nk’Abanyarwanda, ati: “Iyo twifatanyije, tugakora imirimo rusange nk’iyi, twihutisha iterambere ryacu.”
Bamwe mu baturage bitabiriye umuganda bagaragaje ko inama bahawe igiye kubafasha guhindura imyumvire no gutekereza ku hazaza habo.
Mukamana Claudine, yavuze ko bagiye gutangira guhunika umusaruro wabo. Ati: “Twajyaga tweza ibigori n’ibishyimbo, tukabigurisha hafi ya byose, amafaranga tukayakoresha mu bindi. Mu gihe cy’izuba, tukabura icyo turya. Ubu twiyemeje kuzajya tubika igice cy’umusaruro wacu kugira ngo tuzirinde inzara”
Naho Nshimiyimana Jean Pierre we yagize ati: “Iyi nama iduhaye isomo rikomeye. Ngiye gutangira kubika umusaruro wanjye neza, kandi nigire n’uburyo bwo kuwubyaza inyungu igihe bikenewe, aho kuwugurisha wose ako kanya.”
Minisitiri Dr.Uwituze yasoje asaba abaturage gukomeza gukorera hamwe, bakubahiriza inama bahabwa, anabibutsa ko guhunika atari ukwihunza amasoko, ahubwo ari uburyo bwo kwirinda ibihe bikomeye no kugira ubuzima butekanye, bushingiye ku bushobozi bwo kwigira no kwihaza mu biribwa bakabona gusagurira amasoko.
