Ubuyobozi bw’Akarere ka Kirehe bugaragaza ko mu gihe aka Karere kagiye kwakira irushanwa ry’amagare rya Kirehe Race, rigiye kuba ku nshuro ya Kane muri iyi wikendi abaturage basabwa kuzitabira ari benshi kandi bakazakira neza abashyitsi bazaza babagana.
Ibi ubuyobozi burabugarukaho mu gihe kuri uyu Gatandatu tariki 11 no ku Cyumweru tariki 12 Ukwakira 2025, mu Karere ka Kirehe harabera isiganwa ry’amagare rya “Kirehe Race”.
Ni irushanwa aho abazasiganwa ku ikubitiro bazahagurukira mu mujyi wa Kigali berekeza ku biro by’Akarere ka Kirehe.
Mu kiganiro cyihariye MUHAZIYACU yagiranye n’Umuyobozi w’Akarere ka Kirehe, Rangira Bruno agaragaza ko iri rushanwa ari kimwe mu bizakurura ba mukerarugendo baje gusura aka Karere, yemeza ko abaturage bazabigiramo uruhare bakira abashyitsi banabatembereza.
Yagize ati: “Iri rushanwa ridufitiye akamaro gakomeye cyane mu rwego rw’imyidagaduro abakunzi b’igare bazishima kuko bazareba abakinnyi baba abo mu Rwanda no hanze ariko ni umwanya w’uko abacuruzi bazatanga serivise nziza. Ikindi ni mu rwego rw’ubukerarugendo dufite imisozi, dufite ibiyaga ndetse n’amasumo ya Rusumo n’ahandi aho abakinnyi bazajya banyura.”
Meya Rangira yakomeje agaragaza ko uyu mukino uzamura impano z’abakiri bato kuko nabo baboneraho umwanya wo kwigaragaza, nabo bakazavamo abakinnyi mpuzamahanga.
Yagize ati: “Hano abakinnyi ba matabaro (Pineu Ballon) nabo baraza bakigaragaza ku buryo hari impano zihazamukira nabo bakaba abakinnyi babigize umwuga.”
Agaruka ku kuba intego bari bafite bategura bwa mbere “Kirehe Race” niba yaragezweho, Meya Rangira yasobanuye ko hari ibyo bamaze kugeraho ariko hakiri urugendo.
Yagize ati: “Icyo twari tugamije mbere na mbere ni uguteza imbere imyidagaduro cyane cyane umukino w’amagare kandi ubu umaze kumenyekana n’abaturage bacu barawitabira baba abaje kuwureba ndetse n’abakina, ikindi ni ukumenyekanisha akarere mu byiciro bitandukanye haba mu itangazamakuru no ku mbuga nkoranyambaga, aho hose uba umwanya w’Akarere kacu kugira ngo kamenyekane.”
Irushanwa rya “Kirehe Race” ryateguwe ku bufatanye bw’ubuyobozi bw’Akarere ka Kirehe ndetse n’Ishyirahamwe ry’Umukino w’Amagare mu Rwanda (FERWACY), kuri iyi nshuro ya a Kane rizamara iminsi ibiri ribera muri Kirehe.
