Umuyobozi w’Akarere ka Bugesera, Mutabazi Richard yasabye abaturage kwirinda ivangura iryo ari ryo ryose ngo kuko rivuna abaryimitse, abakangurira kurushaho gusigasira ubumwe n’ubudaheranwa nk’inkingi Abanyarwanda bubakiyeho iterambere n’imibereho myiza.
Ibi Meya Mutabazi yabigarutseho kuri uyu wa Gatatu tariki 01 Ukwakira 2025, ubwo yatangizaga ku mugaragaro ukwezi kw’ubumwe n’ubudaheranwa mu Karere ka Bugesera, ku rwego rw’Akarere iki gikorwa cyatangirijwe mu Murenge wa Ruhuha.
Yagize ati: “Dukomeze kuzirikana ko Igihugu cyabohowe, tugakomeza kuzirikana ubwo bumwe n’ubudaheranwa kuko ariyo nkingi twubakiyeho. Turasabwa gukangurira abandi baturage, cyane cyane urubyiruko kwirinda ingengabitekerezo ya Jenoside; tuzi aho yatugejeje kandi turacyabona ko ihari. Kwirinda ivangura iryo ari yo ryose ni ikintu kibi kuko ivangura rirahendesha kandi riravuna.”
Muri iki gikorwa kandi, Meya Mutabazi agaragaza ko gukomeza gusigasira ubumwe n’ubudaheranwa hakenewe ubufatanye mu nzego z’ubuyobozi ndetse n’abikorera.
Ati: “Turasabwa kunoza imikoranire mu nzego bwite za Leta n’abafatanyabikorwa kugira ngo twimakaze ubumwe n’ubudaheranwa. Ibyo rero tuzabigeraho binyuze mu biganiro by’ubumwe n’ubudaheranwa tuzakora muri uku kwezi. Hari ibiganiro ku ndangagaciro z’umuco nyarwanda mu mashuri, mu bakozi, no mu bindi bigo bihuriramo abantu benshi.”
Muri uku kwezi kwahariwe kwimakaza ubumwe n’ubudaheranwa bw’Abanyarwanda mu Karere ka Bugesera, hazakorwa ibikorwa bitandukanye birimo gutanga ibiganiro ku bumwe n’ubudaheranwa, inyigisho ku ndangagaciro na kirazira ndetse n’ibiganiro kuri agahunda ya Ndi Umunyarwanda bizatangwa mu mashuri, mu bigo bitandukanye, mu bakozi, mu rubyiruko no mu matsinda atandukanye.
Ubushakashatsi bugaragaza ko igipimo cy’ubumwe n’ubudaheranwa mu Banyarwanda cyagiye kizamuka, aho muri 2020 cyageze kuri 94.7%. Ubushakashatsi bwakozwe na MINUBUMWE muri 2023 bugaragaza kandi ko Abanyarwanda bageze ku gipimo gishimishije cy’Ubudaheranwa, aho ubudaheranwa ku muntu ku giti cye bugeze kuri 75% mu gihe ku rwgo rw’inzego buri ku kigero cya 92%.
