Bamwe mu baturage bo mu Karere ka Ngoma baravuga ko bishimiye kuba ikigo cy’Igihugu cy’ibimenyetso bishingiye ku bumenyi n’ubuhanga bikoreshwa mu butabera (RFI) kigiye kujya gipima uturemangingo ndangasano tw’inyamaswa n’ibimera mu gutanga ubutabera ku batemewe imyaka nk’insina n’amatungo nk’inka.
Kuri uyu wa Kane, tariki 25 Nzeri 2025 ikigo RFI cyari mu Karere ka Ngoma mu bukangurambaga bwiswe “Sobanukirwa RFI 2025”
RFI yaganirije bamwe mu bayobozi bagera kuri 260 bo muri aka Karere ku bijyanye na serivise iki kigo gitanga zirimo iz’uturemangingo ndangasano(ADN), serivise yo gupima uburozi n’ingano ya alukoro mu maraso, serivise yo gupima ibiyobyabwenge n’ibinyabutabire, serivise yo gupima inyandiko zigibwaho impaka n’ibikumwe.
Gitanga kandi serivise yo gusuzuma ibimenyetso bishingiye ku ikoranabuhanga, serivise yo gusuzuma inkomere n’imibiri y’abitabye Imana, serivise yo gusuzuma ibyahumanyijwe na mikorobe, serivise yo gupima ibimenyetso by’imbunda n’amasasu.
Umuyobozi Mukuru w’Ikigo cy’Igihugu cy’ibimenyetso bishingiye ku bumenyi n’ubuhanga bikoreshwa mu butabera (RFI), Lt Col (Rtd) Dr. Charles Karangwa yavuze ko amahugurwa agamije gusobanurira Abanyarwanda serivise batanga kugira ngo babone ubutabera bunoze.
Dr Karangwa yavuze ko bagiye gutangira gutanga izindi serivise nshya zitari zisanzwe mu minsi iri mbere.
Yagize ati: “Kuva mu kwezi kwa Mbere k’umwaka utaha 2026 tuzajya dupima uturemangingo ndangasano tw’inyamaswa n’ibimera kugira ngo dushobore gutanga ubutabera. Ubundi twakoraga akaremangingo ndangasano ku bantu gusa.”
“Ubu rwose tuzajya tubafasha, umupanga wabikoze ndetse tubihuze n’akaremangingo ndangasano k’itungo ryatemwe.”
Akomeza avuga ko haricyo bizafasha kugira ngo abagenzacyaha babone ikimenyetso bazajyana mu rubanza.”
Bamwe mu baturage baganiriye na MUHAZIYACU bavuga ko bishimiye iki gikorwa gishya cya RFI.
Bora Esperance, ati: “Tujya twumva mu makuru hari abantu bica inka z’abantu bakagenda ntibamenyekane cyangwa se nk’igihe cyegereje ibiganiro byo kwibuka hakaba abantu bajya gutema imyaka y’umuntu bakamwangiriza ibyo bintu bikaburirwa ikimenyesto, nimba rero bigiye kuboneka byaba ari byiza kuko bigiye kuzana ubutabera bukwiriye.”
Itangishaka Abdulkarim, ati: “Intsina mu gihe cy’impeshyi bajyamo bakazitemera inka, nka nyir’intsina yageramo yabibona akifata ku munwa kuko nta kindi kintu yabasha gukora kuko ntabwo aba abazi, rero turabyishimiye kuko abagizi ba nabi tubashije kubamenya hari igihe ibyaha byagabanyuka.”
Kuri ubu RFI ifite gahunda yo kwegereza abaturage serivise zayo aho nko mu Ntara y’Iburasirazuba bateganya gushinga amashami yayo ahantu hatatu harimo mu Karere ka Kirehe, Akarere ka Nyagatare na Rwamagana.
Mu Ntara y’Amajyaruguru bazashyira ishami mu Karere ka Musanze, mu Ntara y’Iburengerazuba bazashinga ishami mu Karere ka Rubavu na Rusizi. Mu Ntara y’Amajyepfo bazarishinga mu Karere ka Huye ndetse bazashinga n’irindi ryihariye rishobora kuzashingwa ku kibuga cy’indege cya Bugesera.
Serivise z’Ikigo cy’Igihugu cy’Ibimenyetso bishingiye ku Bumenyi n’Ubuhanga bikoreshwa mu Butabera (RFI) zigira uruhare mu gutanga ubutabera buboneye aho nko kuva cyashingwa mu mwaka wa 2018 kugeza muri Kanama 2025, kimaze kwakira no gukemura imanza 96,989.
