Ubuyobozi bw’Akarere ka Gatsibo burasaba abakorera ubworozi muri aka Karere kwitabira gukora ubuhinzi bwunganira ubworozi, bahinga ibihingwa bishobora gutunga abantu kandi bikanatanga n’ubwatsi ku matungo, birimo ibigori, soya, ndetse n’ibishyimbo.
Akarere ka Gatsibo kari mu turere tw’Intara y’Iburasirazuba turebwa n’amabwiriza ya Minisitiri w’ubuhinzi n’ubworozi agenga imicungire n’imikoreshereze yihariye y’ubutaka bugenewe ubworozi mu Ntara y’Iburasirazuba.
Aho ateganya ko ibikorwa by’ubuhinzi byunganira ubworozi bigenerwa igice kingana 70% by’ubutaka bwose, naho 30% busigaye bikagerwa ibikorwa by’ubworozi kandi bakororera mu biraro ibizwi nka “zero grazing”.
Bamwe mu borozi baganiriye na MUHAZIYACU bavuze ko iyi gahunda yo guhinga ibihingwa byunganira ubworozi ari gahunda nziza izatuma bagabanya ikibazo cy’ibura ry’ubwatsi mu gihe cy’izuba, n’inka zabo zigatanga umusaruro uhagije.
Kagenza Jean Marie Vianney utuye mu Murenge wa Kabarore, yagize ati: “Inaha birakorwa ariko si buri wese kuko bisaba ubushobozi, ariko abafite amafamu manini barabikora, imishini zikaza zikabisya zigakoramo sondori, hano muri Kabarore birakorwa kandi rwose bitanga umusaruro ufatika”.
Tuyisenge Emmanuel utuye mu Murenge wa Gitoki, yagize ati: “Hano muri Gitoki nta bworozi nk’ubwo buhari, ariko hakurya muri Kabarore niho hari amafamu ariko ntarahingwamo, biramutse bishyizwe mu bikorwa byatanga umusarururo uhagije”.
Umuyobozi w’Akarere ka Gatsibo wungirije ushinzwe iterambere ry’ubukungu Sekanyange Jean Leonard, avuga ko aborozi bamaze kumva inyungu iri mu gukora ubuhinzi bwunganira ubworozi ku mafamu.
Yagize ati: “Ubuhinzi ku mafamu n’ubuhinzi bwunganira ubworozi ntabwo uri ukuvuga ngo ifamu turayihindura tuvuge ko mu mikoreshereze yayo ari ubuhinzi, oya. Ni ukuvuga ngo ibyo agiye guhinga 70% y’ubutaka agomba guhingamo ibihingwa bizamufasha kugaburira amatungo, bishobora kuba soya, ibigori, cyangwa ibishyimbo, rero n’uburyo bwiza aho ushobora kubona ibyo kurya abantu barya nk’ibiribwa, ariko ukabona n’ibindi amatungo yawe arya kandi ku buryo bwiza buruta uko inka zirirwaga ku musozi zirisha ubwatsi ugasanga bwashizeho zikabura icyo zirya.”
“Hari abamaze kubyumva kandi harimo inyungu rwose, niyo mpamvu dushishikariza aborozi ko bakoresha ubu buryo bwo guhinga 70% bahinga ibyo bihingwa byunganira amatungo, hanyuma 30% hakaba ariho inka zajya ziramburira amaguru, turashaka ko bororera mu biraro.”
Aya mabwiriza yashyizweho hagamijwe kurushaho kubyaza umusaruro ubutaka bukoreshwaho ubworozi no kongera umukamo ndetse n’umusaruro w’ubuhinzi mu bwinshi; hagamijwe kandi kurushaho kurwanya indwara ziterwa no kuzerereza inka hirindwa cyane cyane indwara y’Uburenge.
Imibare yo mu mwaka wa 2025 igaragaza ko mu Karere ka Gatsibo harorewe inka 69,960.
Mu karere ka Gatsibo haboneka umukamo ungana na litiro 64,330 ku munsi agemurwa mu makusanyirizo manini atanu ndetse n’amato 10.
