Abaturage bo mu Murenge wa Bwisige mu Karere ka Gicumbi bemeza imwe mu misozi batinyaga, yanabatezaga isuri, kuri ubu bayigana bishimye kuko Umushinga Green Gicumbi wabigishije kuhatera kawa yatangiye no kubaha amafaranga.
Mu Mudugudu wa Munini mu Kagari ka Gihuke niho hateye ibiti birenga ibihumbi 100 bya kawa ku buso bwa hegitari 40.
Ni ahantu aba baturage bemeza ko mbere hari habangamiye ubuzima bwabo, ariko ubu bakaba bahafata nk’inyungu kuri koperative yabo.
Nabagize Fatima ni umwe mu bakozi ba Koperative y’abahinzi ba kawa, ni umwe mu baturage bavukiye muri iki gice, yagize ati: “Aha ni ku musozi hamanukaga amazi menshi yewe no kuhaca indinganire (amaterasi) ntibijya bishoboka, ariko ubu umushinga Green Gicumbi wahateye ikawa, bacamo imiringoti n’imiferenge; y’ amazi yasangaga abantu mu ngo ararangira.”
Iki gice cya Bwisige kirangwa n’imisozi miremire kandi ni ahantu hari hagati, si mu bukonje cyane, kandi nta bushyuhe buhaba; ibi byatumye bashakirwa kawa yihariye igendanye n’imiterere yaho.
Umwe mu baturage umaze imyaka 45 atuye muri ibi bice ni Ngurumuryango Celestin, yemeza ko nta cyizere cy’ibyo bafite ubu bigeze bagira bitewe n’imiterere yaho.
Yakomeje agira ati: “Kuva menya ubwenge, aha hantu hari mu haname, habaga inshinge gusa, abana baza kuharagira. Kuva bahatera ikawa, ubu ni ubwa kabiri dusaruye kandi amafaranga yaradufashije cyane, njye ubu maze gukuramo amafanga ibihumbi 100Frw.”
“Tubura Kawa Gihuke’ niryo zina ry’iyi koperative igizwe n’abanyamuryango 137, muri iki gice nta kawa yahahingwaga ndetse ngo hari abigeze kubigerageza ariko umuvu urazitwara. Kuva bafashwa guhinga kawa, aba baturage banubakiwe uruganda ruyitonora.
Umukozi w’umushinga Green Gicumbi ushinzwe ubuhinzi yitwa Ntakirutimana Jerome, yemeza ko kuri site ya Gihuke bahahuje ubutaka, banateramo ibiti bivangwa n’imyaka ku buryo hashobora guhingwamo ibindi biribwa nk’ibihaza.
Kuri sizoni imwe, igiti kimwe gishobora kweraho ibiro 10, ibi bigatanga icyizere ko aba baturage bazarushaho gutera imbere, kuko ikawa bahinga nta nyongeramusaruro zituruka mu nganda bakoresha ndetse bakaba bashaka icyangombwa cyemeza ko bahinga nta fumbire mvaruganda bakoresha.
Umuyobozi w’umushinga Green Gicumbi Kagenza Jean Marie Vianney yavuze ko izi hegitari 40 zateweho ikawa yo ku musozi, yihanganira imihindagurikire y’ibihe
hagamijwe guhangana n’ingaruka zikomoka ku mihindagurikire y’ibihe no kongera
umusaruro w’ikawa.
Ikawa yo ku musozi yafashije abaturage, kwinjiza amafaranga, akomoka ku musaruro buri gihembwe cy’isarura, bityo bituma
biteza imbere kandi bibafasha guhindura imibereho.
Abahinzi 137 ni bo bashyizwe hamwe maze bashinga koperative, batererwa ikawa yo ku musozi, iyi koperative ya Tubura kawa Gihuke igizwe n’abagabo 93 n’abagore 44, ikindi ni uko abahinzi barenga 2600 bahawe ingemwe z’ikawa zo gutera mu mirima yabo hirya no hino mu mirenge ikorerwamo n’umushinga Green Gicumbi.
