Bamwe mu baturage baturiye isoko nyambukiranya mipaka ya Rusumo mu Karere ka Kirehe riherereye ku Rusumo ku mupaka uhuza ibihugu bya Tanzania n’u Rwanda, mu Murenge wa Kigarama, bavuga ko ritabyazwa umusaruro nk’uko bikwiye.
Ni mu gihe hashize igihe kigera ku myaka 4 ku Rusumo huzuye inyubako n’ibindi bikorwaremezo byahashyizwe ngo byorohereze abacuruzi n’abarema isoko, byuzuye bitwaye amafaranga y’u Rwanda agera kuri Miliyari enye; gusa kugeza ubu nta rujya n’uriza rw’abantu bitabira kurikoreramo no kurirema uko bikwiye.
Iyo bifitanye isano: Kirehe: Ubuyobozi burashishikariza abaturage kubyaza umusaruro isoko rya Rusumo
Bamwe mu barituriye ndetse n’abarikoreramo bavuga ko ritabyazwa musaruro nk’uko byakagombye, bagasaba inzego bireba ko zakemura icyo kibazo nk’uko abaganiriye na MUHAZIYACU babigaragaza.
Marembo Regine ni umubyeyi twasanze kuri iri soko yagize ati:”Iri soko ryubakwa twumvaga ko abatuye hano ku mupaka dusubijwe kuko twateketezaga ko rizakorerwamo n’abantu batururutse mu bihugu byombi none tubona atariko bimeze, twifuza ko byahinduka iri soko rikabyazwa umusaruro nk’uko bikwiye.”
Uwimana Afisa ucururiza muri iri soko yagize ati: “Dukorera hano ariko urujya n’uruza rw’abantu ruracyari ruke, ibidutera ibihombo kuko tutabona abaduteza imbere, tuza muri iri soko batubwiraga ko rizakorerwamo n’abaturutse impande n’impande ariko siko byagenze.Twifuza ko byahinduka iri soko rigafasha abarituriye.”
Umuyobozi w’Akarere ka Kirehe wungirije ushinzwe iterambere ry’ubukungu, Nzirabatinya Modeste avuga ko ibyifuzo by’abaturage kuri iri soko mpuzamipaka rya Rusumo byatangiye kuganirwaho, kandi hatangiye ubukangurambaga ku bikorera haba abo mu Rwanda ndetse nabo ku ruhande rwa Tanzania.
Yagize ati: ”Turakomeza ubukangurambaga muri PSF, gukorana na PSF ya Tanzania kugira ngo bazane ibicuruzwa byabo, turimo kuganira kugira ngo turebe uburyo hagenwa iminsi irenze umwe ririya soko ryajya riremeraho kandi rihere mugitondo.”
Abacuruzi n’abaturiye iri soko bavuga ko mu gihe iri soko ryabyazwa umusaruro uko bikwiye rikaremwa n’urujya n’uruza rw’abaturutse mu bihugu byombi, igipimo cy’iterambere ryabo cyazamuka ndetse n’Igihugu muri rusange.
Icyakora hari abavuga ko kuba ryarubatswe neza ku mupaka wa Rusumo, uri ku ruhande ugereranye n’aho abaturage b’ibihugu byombi batuye, no kuba ahanini urujya n’uruza kuri uyu mupaka rugaragara ruturuka ku makamyo aba atwaye ibicuruzwa kurusha urw’abantu basanzwe bampukira kuri uyu mupaka umunsi ku wundi; biri mu bituma iri soko rititabirwa uko bikwiye ku buryo inzego bireba zikwiye kubishakira ibisubizo.
