Mu nama y’umutekano yaguye yateranye ku wa Kabiri, tariki 16 Mutarama mu Karere ka Ngoma, hagaragajwe ko ubujura, gusambanya abana, gukubita no gukomeretsa biri mu byaha biza ku isonga mu byakozwe mu minsi mikuru isoza umwaka w’ 2023 n’itangira 2024, hafatwa n’ingamba zo gukaza umutekano muri uyu mwaka.
Ni nama yitabiriwe n’abagize ibyiciro bitandukanye muri aka karere barimo Abayobozi b’Akarere, Inzego z’umutekano, Umuyobozi w’Ibitaro bikuru bya Kibungo, Abanyamabanga Nshingwabikorwa b’imirenge n’Utugari ndetse n’abayobozi b’amashami bakora mu karere.
Ubuyobozi bw’Akarere ka Ngoma bwagaragaje ko mu minsi mikuru ya Noheli na Bonane uhereye tariki 24 Ukuboza 2023 kugeza 15 Mutarama 2024, hakozwe ubujura bungana na 15, hagaragara icyaha cyo gusambanya abana inshuro 7, gukubita no gukomeretsa 9.
Muri iki gihe, urupfu rutunguranye rwagaragaye inshuro imwe, gukoresha ibiyobyabwenge 6, impanuka 7, ibiza bigaragara inshuro 7, gushaka kwiyahura 6 n’ibindi.
Hanagaragajwe ko imbogamizi zabaye zirimo ibitaramo n’ibindi birori bitamenyekanishijwe uko bikwiye, gukererwa mu mitangire ya za raporo, raporo ziza zituzuye cyangwa ziza zidahuye n’ukuri.
Polisi ikorera muri Ngoma nayo yagaragaje ko umutekano wari wifashe neza nubwo bitabaye 100% kuko bakiriye ibyaha 136, harimo ku isonga nko gutobora amazu bakiriye ibirego 36, gukubita no gukomeretsa byatewe akenshi n’ubusinzi bagize ibirego 28, ubujura bworohereje 25.
Mu bindi harimo gukoresha ibiyobyabwenge 23, gusambanya abana 10, hafashwe udupfunyika tw’urumogi 135 hanafatwa abantu 12 babikoraga, hafashwe litiro 58 za kanyanga n’abakekwaho icyaha 5, inzoga z’inkorano hafashwe litiro 315, habaye impanuka 9 hakomereka abantu 11 hapfa abantu 3.
Umuyobozi ushinzwe Urwego rw’Igihugu rw’Ubugenzacyaha(RIB)mu Karere ka Ngoma, Intijumurerwa Carmel, yavuze ko mu Ukuboza 2023 bashyizemo imbaraga bakora amarondo nubwo hatabura ibibaca mu rihumye.
Ati “Twagize ibirego 175 byose ni byaha byakozwe hano muri Ngoma, mu bushinjacyaha twoherejemo amadosiye 169. Muri ibyo byaha byose ubujura buri ku isonga hakozwe ibigera kuri 81; abo n’abaturage bibwe, ubujura bworohereje 33, gusambanya abana 46, gukubita no gukomeretsa 34, ibiyobyabwenge ibirego 24.”
Umuyobozi w’Akarere ka Ngoma, Niyonagira Nathalie, yavuze ko mu minsi mikuru umutekano wagenze neza kubera gukurikiza amabwiriza yashyizweho bikanagabanya ibyaha byo gukubita no gukomeretsa abantu basinze mu kabari.
Yasabye abitabiriye inama gufasha abaturage kwicungira umutekano no kuwukurikirana ahantu hose hashoboka bakora amarondo (irondo rishingiye ku isibo) aho batuye.
Ati “Twabonye irondo rishingiye ku isibo niyo harara umuntu umwe twabona mu mudugudu abantu barindwi ariko twasabye ko harara babiri muri buri sibo ku buryo abantu bagera mu mudugudu umwe hejuru y’icumi.”
Mu bundi butumwa bwatanzwe harimo kwirinda ibiyobyabwenge, gukangurira urubyiruko rwifotoje gufata indangamuntu zabo ku mirenge, kurwanya inda ziterwa abangavu no gufata neza umusaruro no kwirinda kurarana n’amatungo.
