Ubuyobozi bw’Akarere ka Ngoma bwasabye urubyiruko kwirinda ibiyobyabwenge, kwirinda ubusambanyi, gukumira no kwirinda ihohoterwa rikorerwa abagore n’abakobwa kuko byabarangaza bikabangiriza ubuzima, mu gihe ubuzima bwiza ari bwo gishoro kinini bafite.
Ni ibikubiye mu butumwa Nyiridandi Mapambano Umuyobozi w’Akarere ka Ngoma wungirije ushinzwe iterambere ry’ubukungu yatanze kuri uyu wa Gatanu tariki ya 27 Mutarama 2023, ubwo yaganiraga n’urubyiruko rwitabiriye kureba imikino y’Umurenge Kagame Cup yabereye kuri Sitade ya Ngoma afite insanganyamatsiko igira iti “Twimakaze imiyoborere myiza twifuza dushyira umuturage ku isonga.”
Yagize ati: “Umutungo igihugu gifite kandi ukomeye ni urubyiruko kandi kugira ngo uwo mutungo tuwubyaze umusaruro abaturage bagomba kugira ubuzima bwiza n’imibereho myiza, niyo mpamvu tugomba kurinda ubuzima bwacu ndetse tunakora siporo kuko ariyo soko y’ubuzima bwiza.”
Bwongeye kubibutsa ko bagomba kwirinda kwijandika mu biyobyabwenge kuko byica ubuzima bwabo, kwishora mu busambanyi butuma hari abaterwa inda z’imburagihe, hanyuma kandi urubyiruko rugakora cyane hirindwa ko rwaba imburabusa, ibirara, ubuzererezi n’ubwomanzi ahubwo bakishyira hamwe bakizigamira nko mu bwizigamire burambye nka Ejo Heza izabafasha mu kugira ubuzima bwiza no gusaza batanduranyije.
Urubyiruko rwitabiriye iyi mikino ubu ruvuga ko bahungukiye byinshi bazasangiza bagenzi babo bigana n’abo bahura nabo kandi ko bafashe ingamba zo kwirinda gukoresha ibiyobyabwenge no kudahishira ababikoresha
Turatsinze Claude, utuye mu Murenge wa Mutenderi avuga ko agiye gufatanya n’abandi mu kurwanya ibiyobyabwenge, ati: “Ubutumwa baduhaye ku buzima bubi ukoresha ibiyobyabwenge anyuramo, nk’umunyeshuri ingamba nafashe ni izo kwirinda no kurinda bagenzi banjye no kubashishikariza kwirinda ibiyobyabwenge.”
Uwimana Clarisse wo mu murenge wa Rukira yagize ati: “Guhera ubu tugiye kuzajya dutanga amakuru y’abakoresha ibiyobyabwenge, nirinde abanshukisha ibintu bagamije kunsambanya, kuko twumvise ko bigira ingaruka nyinshi ku rubyiruko, ikindi nzirinda ibigare by’urubyiruko ndetse no kudakurikiza imico tubona muri filime n’indirimbo.”
Ubushakashatsi bwakoze n’ishami rishinzwe ubuzima bwo mu mutwe mu Kigo cy’Igihugu gishinzwe Ubuzima-RBC muri 2021, bwagaragaje ko 23.1% by’urubyiruko rwo mu Rwanda rwibasiwe bikomeye n’agahinda gakabije kandi rwanabaswe n’inzoga.
Mu mikino yabereye kuri Sitade ya Ngoma mu irushanwa umurenge Kagame Cup 2022/23 ubu igize muri 1/2 aho ikipe y’umupira w’amaguru y’umurenge wa Rukira yatsinze Umurenge wa Mutenderi wanganyije n’Umurenge wa Mutenderi 1-1 mu bahungu, naho mu abakobwa Ikipe ya Rukira itsinda iya Mutenderi igiteko 1-0.
