Umugore usanzwe ari umuyobozi w’Umudugudu wa Terimbere, mu Murenge Jarama, mu Karere ka Ngoma yatawe muri yombi nyuma yo kumena amazi ashyushye ku mugabo we bapfa amakimbirane bagiranye akaza kumukubita
Byabereye mu Murenge wa Jarama mu Kagari ka Jarama mu Mudugudu uyu mugore asanzwe abereye umuyobozi wa Terimbere.
Nsanzuwera Michelle, Umunyamabanga Nshingwabikorwa w’Umurenge wa Jarama ubwo yaganiraga na MUHAZIYACU, yavuze ko uyu mugore uyobora Umudugudu yasutse amazi ashyushye ku mugabo we anabanza kubigira ibanga.
Ati: “Byabaye ejo ahagana saa Munani z’amanywa, amakuru twamenye ni uko yasanze umugabo we aryamye arangije acanira amazi amaze gushyuha cyane aragenda ayamena ku mugabo we, twagerageje kubaza umugore icyabimuteye, atubwira ko yari amaze iminsi ataha yasinze akamukubita.”
Uyu muyobozi yavuze ko bari basanzwe banafitanye amakimbirane yo mu rugo bagiye bihererana batagejeje ku buyobozi, akagira inama abaturage yo kutihererana ibibazo bahura nabyo kandi bafite ubuyobozi bubegereye bakabibwiye.
Ubwo twandikaga iyi nkuru umugabo yari yajyanywe kuvurirwa mu Bitaro bikuru bya Kibungo, umugore wamusutseho amazi akaba afungiye kuri sitasiyo ya RIB ya Jarama.
