Abagabo babiri bari bari kuri moto berekeza i Kirehe bagonzwe n’ikamyo yari ipakiye ingano ivuye ku mupaka wa Rusumo yerekeza Kigali bombi bahita bitaba Imana.
Umuvugizi wa Polisi y’u Rwanda mu Ntara y’Iburasirazuba CIP Hamdun Twizeyimana yabwiye MUHAZIYACU ko iyi mpanuka yabaye saa kumi n’ebyiri n’iminota mirongo itanu z’umugoroba kuri uyu wa 2 Nzeri 2020; n’uko byagenze.
Ati: “Iyo kamyo yari ishoreranye n’izindi igeze hariya mu Murenge wa Kirehe, Akagari ka Kirehe ishaka kuca ku yindi kamyo yari iyiri imbere, ariko aho yayiciriyeho hari hasa n’aharimo ikorosi atareba imbere neza, ahura na moto izamuka ijya Kirehe, ahita ayigonga, umumotari n’umugenzi yari ahetse bose bahita bapfira aho.”
Abagabo babiri bapfuye ni Abanyarwanda, bahise bajyanywa ku Bitaro bya Kirehe.
Umushoferi wari utwaye imodoka yabagonze we ni Umutanzaniya, yajyanywe kuri Sitasiyo ya Polisi ya Kirehe.
CIP Twizeyimana avuga ko impanuka yatewe n’uburangare bw’umushoferi w’ikamyo washatse kunyura ku modoka aho atemerewe, bikamuviramo kugonga umumotari amusanze mu nzira ye.
Ubutumwa Polisi y’u Rwanda itanga mu rwego rwo gukumira impanuka ni ukwibutsa abatwara ibinyabiziga gukomeza kubahiriza amategeko y’umuhanda, kubahiriza umuvuduko wagenwe, ntibashake kunyuranaho abo bitemewe, no bakubahiriza ibyapa n’ibimenyetso biri ku muhanda.
Birababaje gusa police nikore ibyayo