Abagabo barindwi bo mu Mudugudu wa Kagoma mu Kagari k’Isangano mu Murenge wa Ndego mu Karere ka Kayonza, basanzwe bari kubaga imvubu yo mu kiyaga cya Rwakibare bari no kugabana inyama zayo.
Amakuru yizewe Muhazi Yacu ifite ni uko aba bagabo barimo uwitwa Hakizimana, Shema, Habuwonkunda, Rwabagirate, Karimunda na Ngendahayo.
Aba ariko bavuga ko uwishe iyo mvubu ari Hakizimana wafashwe n’uwitwa Thomas batazira Yuda usanzwe ari umuhigi watorotse.
Aba bagabo bishe iyo mvubu kuwa 7 Ugushyingo 2022, saa cyenda z’ijoro.
Muhazi Yacu yahamagaye Umunyamabanga Nshingwabikorwa w’Umurenge wa Ndego, Bizimana Claude, avuga ko ayo makuru ari impamo.
Yagize ati: “Ayo makuru niyo. Ni abaturage barindwi bafashwe bishe imvubu. Twabasanze aho bayiciye ubu bari mu maboko ya RIB.”
Gitifu Bizimana yasabye abaturage kudasagarira izo nyamaswa kuko ziri mu cyanya gikomye, abibutsa ko nabo inyungu z’amadovize zibageraho.
Ati: “Ntibyari bisanzwe kuva aho pariki izitiriwe. Turasaba abaturage kubaha inyamaswa kuko amadevize azivamo agenda atugarukira. Abaturage bakwiriye ahubwo kuzirinda.”
Uyu muyobozi yibukije abaturage ko RDB ibagenera amafaranga muri gahunda ya ‘Revenue Sharing’ kandi ko hari gahunda yo kubaka isoko rya Kiyovu, bikomotse kuri ayo mafaranga yakomotse ku nyamaswa.
Mu ntangiriro z’icyumweru nibwo umugabo witwa Musabyimana wo mu Kagari ka Buhabwa, Umurenge wa Murundi mu Karere ka Kayonza, yatawe muri yombi nyuma yo gusangwa acuruza inyama z’imvubu.
Ubuyobozi muri Kayonza busaba abaturage gufatanya nabwo kurinda inyamaswa z’agasozi.
Bubibutsa ko kurya inyama zazo bishobora kubatera uburwayi kuko zitaba zapimwe.
