Abahinzi b’urutoki mu Murenge wa Mushikiri, Akarere ka Kirehe batewe impungenge n’indwara itazwi yibasiye ibitoki aho gusa n’icyatsi cyijimye, ibitoki bigahinduka umutuku wijimye.
Ni indwara abaturage bavuga ko yatangiye kugaragara mu mpera z’ukwezi kwa Kamena 2020, ubu ikaba yibasiye urutoki rwo mu midugudu ya Kamunyana na Kamarashavu, mu Kagari ka Rugarama, Umurenge wa Mushikiri.
Baramba Ferdinand we ati: “ Hashize ibyumweru bibiri ibi bibaye, bwarakeye tubona ibitoki byashiririye, byana byari bisa neza, ariko gifatwa uyu munsi kigatukura, kandi iyi ndwara ikomeje gukwira mu rutoki, iyi ndwara yatuyobeye pe.”
Umubyeyi witwa Mukafoto Ernestine wo mu Kagari ka Kamarashavu avuga uko iyi ndwara yadutse ati: “Nagiye kubona mbona ibitoki bibaye umutuku kikiri kwana, ubu ntabwo namenya iyi ndwara iyo ari yo. Twese byaradutangaje kandi iri kuduhombya.”
Igiteye urujijo kuri ubu burwayi nk’uko bigaragazwa n’abahinzi b’i Mushikiri ni uko iyo igitoki gifite ubwo burwayi gitonowe cyangwa kigahatwa, mo imbere kiba kigaragara nk’aho ari kizima, ndetse ngo n’uburyohe nta mpinduka zirimo.
Baramba akomoza ahari imbogamizi zishobora no kubateza ubukene yagize ati: “Urahata mo imbere ukabona ni kizima ariko iyo ukijyanye mu isoko bari kwanga kubigura ngo birwaye korona, ubuse turabishyira hehe? Abagoronome bakwiye kuza bakaturebera ibyo ari byo pe.”
Muhayimana Innocent na we avuga impungenge bafite yagize ati: “Ikibazo ni uko ibitoki tutazabishyira ku isoko ngo tubigurishe, ni ukubyirira kuko ku isoko ntabwo bigurwa, urumva amafaranga twabonaga mu rutoki ntabwo biri kugurwa kubera gutya biri gusa. Niba bituruka mu ifumbire, niba ari ibyo mu kirere,…ntabwo tuzi icyateye iyi ndwara pe.”
Umuyobozi w’ishami ry’ubuhinzi n’umutungo kamere mu Karere ka Kirehe Nsengimana Janvier avuga ko iby’iyi ndwara ari ubwa mbere abyumvise.
Ati: “Iki kibazo ntabwo nari nkizi rwose, sinamenya niba ari kirabiranya cyangwa ari indi ndwara, ariko ikintu nk’iki iyo tukimenye, ubu ngiye koherezayo agoronome tuyimenye. Niba ari ndwara nshya tutazi twitabaza RAB ikadufasha, bakaturebera bakaduha n’igisubizo.”
Mugiraneza King Thierry Uyobora ishami ry’ikigo gishinzwe guteza imbere ubuhinzi n’ubworozi -RAB Sitasiyo ya Ngoma ihuriyemo uturere twa Kirehe, Kayonza na Ngoma avuga ko bagiye kwihutira kumenya iby’iki kibazo.
Ati: “Tugiye kubikurikirana, ikipe iraza isuzume irebe ikibazo icyo ari cyo noneho itange inama.”
Mu mirenge 12 igize Akarere ka Kirehe, Mushikiri ni umwe mu mirenge iza imbere mu gukorerwamo ubuhinzi bw’urutoki.
