Ku munsi wa Kabiri w’iri rushanwa, Byukusenge Patrick ukinira JAVA Inovotec ni we wegukanye isiganwa rya Kirehe Race mu cyiciro cy’abagabo bakina barabigize umwuga (Men Elites). Mu gihe ku munsi wa mbere ryari ryegukanwe n’Umunye-Esipanye Alejandro Gainza Rodriguez ukinira ikipe ya May Stars yo mu Rwanda.
Mu cyiciro cy’abakobwa bakuze Nyirarukundo Claudette ari we waryegukanye na nyuma yo kwegukana iryo kuva i Kigali kugera i Kirehe.
Abanya-Kirehe mu babonye ibyishimo mu kwakira isiganwa ry’amagare
Bamwe mu batuye mu Karere ka Kirehe bagaragaza ko bashimishijwe no kwakira irushanwa ry’amagare rya ‘Kirehe Race’ ryakinwaga ku nshuro ya kane muri aka Karere kuko ryatangiye kuhabera kuva mu mwaka wa 2021.
Abaganiriye na MUHAZIYACU bagaragaza ko bishimye kubona iwabo hari amagare, mu gihe hari n’ababonye iri siganwa ku nshuro ya mbere, bemeza ko bari basanzwe barirebera kuri televiziyo bagashimira ubuyobozi bw’Akarere bwaribazaniye iwabo.
Niyogushimwa Olivier utuye mu Murenge wa Kirehe yagize ati: “Iri rushanwa ryari ryiza cyane nishimye bitavugwa kubona niboneye n’amaso yanjye abantu basiganwa ku magare. Umwaka utaha ndifuza ko bazazanamo abanyamahanga benshi ubundi iri rushanwa rikaba mpuzamahanga.”
Nyirarukundo na we yagize ati: “Ibi bintu nabonye ari byiza cyane byandenze, nabonaga biruka cyane kurusha imodoka, ariko nanjye nemeye nza hano nica umubyizi nje kwihera ijisho iri rushanwa, ubundi najyaga mbyumbya kuri Radio ntarabyibonera. Ababiteguye bakoze cyane”
Visi Perezida wa Mbere w’Ishyirahamwe ry’Umukino w’Amagare mu Rwanda (FERWACY), Bigango Valentin, yavuze ko ashimira by’umwihariko Akarere ka Kirehe kagize uruhare mu gutegura iri rushanwa ko ari umusanzu ukomeye bashyira ku irushanwa ry’amagare.
Yemeza ko umwaka utaha yifuza kuzabona Akarere ka Kirehe nako gafite ikipe.
Yagize ati: “Ndabashimira byimazeyo nk’ishyirahamwe ry’amagare mu Rwanda. Kirehe ifite abaturage bishimye cyane, kandi koko mwahuye n’ibikorwa bya Siporo. Mu magare dukunda guhuza abakina n’abafana. Turashimira cyane Meya n’abandi baduteye inkunga ndetse n’abakinnyi bacu. By’umwihariko abafana turabashimira cyane. Hano turashaka ko umwaka utaha hazaba hari ikipe ya Kirehe Cycling Team, nayo ikazakina.”
Umuyobozi w’Akarere ka Kirehe Rangira Bruno, yashimiye FERWACY, ndetse n’abaturage bitabiriye bagafana uyu mukino w’amagare. Yemeza ko bashaka ko mu myaka iri imbere kubona i Kirehe haza gukinirwa n’irushanwa rya ‘Tour du Rwanda’.
Yagize ati: “Ndashimira mwe mwese mwadufashije muri iki gikorwa, ijambo mfite ni ishimwe nshimira na FERWACY kuba irushanwa ryaragenze neza kandi mu mahoro, ndashimira abashinzwe umutekano batubaye hafi umunsi ku wundi ku buryo iri rushanwa badufashije rikagenda neza. Ndashimira kandi abafatanyabikorwa. Iyi nshuro yagenze neza turi no gutegura inshuro ya gatanu kandi iri rushanwa rizagenda neza kurushaho. Binakomeze no mu myaka iri imbere. Icyo nasaba ni uko mwanatuzanira Tour Du Rwanda.”
