Abatuye mu Karere ka Kayonza bavuga bishimiye kongera kubona aho bahahira inyama nyuma y’igihe kigera ku mezi hafi atatu ntawemerewe kubaga, nta nka, ihene, intama n’ingurube byemewe kwinjizwa cyangwa gusohoka mu karere kose; bitewe n’ akato ayo matungo yashyiriweho kubera indwara y’uburenge yahagaragaye.
Tariki 6 Mutarama 2021 nibwo Minisiteri y’Ubuhinzi n’ubworozi yari yashyizeho akato ku matungo yo mu Karere ka Kayonza mu kurwanya no kwirinda ikwirakwiza ry’indwara y’uburenge yari yagaragaye mu nka zororewe mu Mudugudu wa Mucucu, Akagari ka Buhabwa, Umurenge wa Murundi.
Indwara y'Uburenge yagaragaye i Kayonza mu nka zo mu Murenge wa Murundi, Akagari ka Buhabwa, Umudugudu wa Mucucu,
Bimaze gutangazwa na @RwandaAgri"Ingendo z'amatungo (inka, ingurube, ihene n'intama) ku mpamvu iyo ari yo yose zirahagaritswe muri @KayonzaDistrict yose."#RwOT pic.twitter.com/XDQxHDOZVg
— MUHAZI YACU (@muhaziyacu) January 7, 2021
Uyu munsi hashize iminsi ibiri, Minisiteri y’Ubuhinzi n’Ubworozi isohoye itangazo rikuraho akato k’indwara y’uburenge muri aka karere tariki 19 Werurwe 2021, nyuma yuko ngo raporo y’itsinda ryabikurikiranye yagaragaje ko itakiharangwa.
Iri tangazo ryasinyweho na Dr. Gerardine Mukeshimana Minisitiri w’Ubuhinzi n’Ubworozi hari aho rigira riti: “Minisitiri w’ubuhinzi n’ubworozi aramenyesha abantu bose cyane cyane aborozi bo mu Karere ka Kayonza, inzego z’Ubuyobozi n’Umutekano ko akato k’amatungo n’ibiyakomokaho kari kashyizwe mu Karere ka Kayonza gakuweho, bityo ingendo z’amatungo (inka, ihene, intama n’ingurube) n’ibiyakomokaho zikaba zemewe mu Karere ka Kayonza, kimwe n’ahandi hose mu gihugu.”
Bamwe mu batuye mu bice by’Akarere ka Kayonza MUHAZIYACU yaganiriye na bo bavuze ko kuba bari bamaze amezi asaga abiri batabasha kurya inyama no kuzicuruza byabagizeho ingaruka.
Nyiranizeyimana wo mu Murenge wa Kabarondo yagize ati: “Ubu twongeye kubona inyama kuri za busheri ariko hari hagiye gushira amezi atatu tutazibona pe, kubera akato. Ikibazo cy’uburenge cyari cyagaragaye i Murundi akarere kose bahita badushyira mu kato, ubu urabona ko ari byiza n’ ubu mvuye kuzizaha.”
Naho umwe mu bakora ubucuruzi bw’inyama mu Murenge wa Rwinkwavu yabwiye MUHAZIYACU ko yahombejwe no kumara amezi asaga abiri adakora.
Ati: “Ubu urabona ko akazi kongeye gusubukurwa ariko guhera ku itariki 6 z’ukwa mbere kubaga ntabwo byari byemewe kandi ni byo byari bidutunze; urumva nawe niba naraguraga inka nkabaga, akaba ari ko kazi kanjye, ubu nkaba maze amezi abiri ntakora, ni ibihombo gusa.”
Niba ushaka kumenya byinshi ku ndwara y’uburenge wasoma izi nkuru zindi:
- Iburasirazuba: Aborozi bagomba guhora bari maso ku ndwara y’uburenge
- Imirenge Icyenda mu kato nyuma y’indwara y’uburenge yagaragaye mu nka i Kayonza
Umurenge wa Murundi uherutse kugaragaramo uburenge, bikaba n’impamvu yo gushyira akarere kose ka Kayonza mu kato ku matungo y’inka, ihene, intama n’ingurube, ubworozi bw’inka ni yo soko y’imibereho ku baturage bawo benshi.
Uyu murenge wonyine ubarurwamo inzuri (amafamu) 1,502 n’ inka zirenga ibihumbi 20, aborozi baho mu bihe bisanzwe bakaba bagemura ku ikusanyirizo amata angana na litiro ibihumbi 10,000 ku munsi.
Mu buryo bugari, mu ngaruka zigera aho byemejwe ko hagaragaye indwara y’uburenge ni ugushyira mu kato amatungo yaho kandi ntihagire ava ahandi yemererwa kuhagera, aborozi ntibemererwe kuyagurisha no kuyabaga, … bikaba bihungabanya ubukungu bw’aborozi ndetse n’igihugu muri rusange, bikanemezwa n’impuguke mu bworozi zo mu kigo gishinzwe guteza imbere ubuhinzi n’ubworozi mu Rwanda –RAB.
Minisiteri y’Ubuhinzi n’Ubworozi isaba abantu mu nzego zose gukomeza ubufatanye mu “kurushaho gutanga umusanzu wabo mu gukumira uburwayi bw’amatungo”.
