Abahinzi b’ibigori bo mu bice bitandukanye by’Akarere ka Ngoma baravuga ko batangiye kubona umusaruro mwiza muri iki gihembwe cya 2021A, icyakora muri bo hari abafite impungenge z’uko ushobora kwangizwa n’uko nta hantu hahagije ho kuwusarurira, kuko ubwanikiro Leta yubatse ari buke.
Abahinzi baragaragaza ibi, mu gihe ubu Akarere ka Ngoma katangije ubukangurambaga bwo gufata neza umusaruro wabonetse mu gihembwe cy’ihinga kiri ku musozo cya 2021A, buzarangira mu kwezi kwa Gashyantare.
Ubuyobozi bw’aka karere butangaza ko umusaruro w’ibigori witezwe ari toni ziri hagati y’ibihumbi 55 n ’ibihumbi 60, ku buso byahinzweho muri iki gihembwe cy’ihinga bwa hegitari zisaga ibihumbi 21, mu mirenge 14 ikagize.
Abahinzi b’ibigori MUHAZIYACU yavuganye na bo mu Murenge wa Jarama bahuriza ku kugaragagaza ko umusaruro bafite ari mwiza, bakagaragaza impungenge y’uko ushobora kwangirikira mu isarura bitewe nuko nta hantu heza ho gusarurira hazwi nka hangari hasakaye bafite.
Muhire Mathias yagize ati: “Ibigori byacu bireze pe, nubwo habanje kuva izuba ariko umusaruro umeze neza, njyewe mpinga hegitari hafi n’igice niteguye kwezaho toni ebyiri, ariko ikibazo gihari ni uko tudafite ubwanikiro buhagije. Ubu muri kano gace hari hangari imwe gusa isakaye, turifuza ko mu Kagari ka Karenge haba nibura hangari enye, kugira ngo umusaruro tubashe kuwufata neza.”
Ngiruwonsanga Athanase na we ati: “Dufite impungenge z’uko tuzajya gusura nk’abahinzi babiri batangiye gusarura mbere bazana umusaruro wabo muri iyi hangari nziza yubatswe na Leta, tugasanga babiri bonyine barahujuje twebwe tukabura aho dusarurira. Ubu bwanikiro ni buto, keretse batwubakiye n’ubundi, ariko hagati aha tutabubonye twasaba nibura ko Ubuyobozi bwadufasha kubona inkunga bakatuzanira amashitingi, tukajya twanika neza, tukananura umusaruro wacu kuko n’imvura iri kugwa.”
Ku rundi ruhande, muri aka Karere ka Ngoma hari abayobotse uburyo bwo kwikorera za hangari zidasakaye, mu buryo buciriritse hafi y’ingo zabo kandi ngo birafasha.
Uwimana Paulina ni umwe mu batangiye gusarurira kuri hangari y’ibiti iri mu mbuga ye, agira ati: “Ubu njyewe ndateganya kweza nka toni umunani kandi gusharika gutya birafasha, maze imyaka 3 mbikora. Icyo bifasha ni uko iyo imvura iguye kubera ko haba hariho ibishishwa kandi ikigori kiba gicuramye amazi ntabwo yinjiramo imbere, ntabwo ikigori cyangirika.”
Umuyobozi wungirije w’Akarere ka Ngoma ushinzwe iterambere ry’ubukungu, Mapambano Nyiridandi avuga ko abahinzi bakwiye kwirinda ko umusaruro w’ibigori wabonetse wangirika, kuko ari byo bituma babona abaguzi beza.
Ati: “Umuturage wese atekereze imvune yagize mu guhinga, ubu tugeze mu isarura, ni igihe cyo gufata neza umusaruro kugira ngo uzamugurira atware ibigori bifite ubuziranenge. Kandi uko umuhinzi abifata neza ntibinyagirwe ngo hazemo uruhumbu bituma hazamo icyo twita ‘Aflatoxin’; bituma n’abazaza kubagurira bazabaha amafaranga meza.”
Mu Karere ka Ngoma harimo ubwanikiro bw’ibigori bugera ku 111 bwa kijyambere busakaye burimo ubugera kuri 93 buherutse kubakwa mu mwaka wa 2019-2020 bukuzura butwaye amafaranga y’u Rwanda agera kuri miliyari na miliyoni 400.
Icyakora icyo ubuyobozi buhurizaho n’abahinzi ni uko koko ubwo bwanikiro budahagije ugereranyije n’umusaruro uboneka kandi wose uba ugomba gufatwa neza.
Abahinzi barasabwa kwishakamo ubisubizo
Visimeya Mapambano avuga ko mu Karere ka Ngoma hari uburyo abaturage batari bake bamaze kumenyera bwo kubaka ‘ubwanikiro bwo mu rugo’.
Ati: “Abenshi bamaze kubigira umuco, mu ngo zabo bubaka ubwanikiro bwo mu rugo bw’ibiti busanzwe, ..ni uburyo bwo kwishakamo ibisubizo kandi byagaragaye ko gusharika ibigori bigashyirwaho bibirinda kwangirika. Ubu twari dufite ubwanikiro nk’ubwo buciriritse bugera 2800, ariko ubu muri iri sarura turateganya kugera ku bwanikiro 6000, turasaba rwose ko buri muturage yishakamo ibisubizo akubaka ubwo bwanikiro bwunganira bwa bundi bwa Leta; kugira ngo tubashe gufata neza umusaruro.”
Naho ku basaba guhabwa amashitingi Mapambano yagize ati: “ Ubu turashishikariza abahinzi gukora ubuhinzi bugamije isoko, dukwiye no gutekereza ko niba twarabonye inkunga ubushize itazahoraho, kuko n’iyo shitingi zije ziza ari nke, ni yo mpamvu akwiye kureba ngo niba yejeje toni eshanu, gukuraho bike akagura shitingi izamufasha kurinda undi musaruro kwangirika, akabyumva neza; icyakora ubuvugizi na bwo turakomeza tubukore”.
