Minisitiri w’ubuhinzi n’ubworozi Dr. Mukeshimana Geraldine avuga ko hari aho kongera umusaruro w’ubuhinzi bikiri ikibazo kigoranye kizakemurwa n’ uruhare rwa buri wese cyane cyane umuhinzi niyubahiriza inama agirwa n’abashinzwe ubuhinzi.
Ni ibikubiye mu butumwa Dr.Mukeshimana yatangiye mu Karere ka Gatsibo kuri uyu wa 01 Ukwakira, atangiza ku mugaragaro igihembwe cy’ihinga cya 2022A.
Mu Kagari ka Kangese mu gishanga cya Cyampirita kiri mu Murenge wa Rugarama ni ho hatangirijwe iki gihembwe cy’ihinga, ni igishanga kizahingwamo ibigori ku buso bwa hegitari 50 by’ubutaka buhuje kikaba gihingwa n’abibumbiye muri Koperative KOPECUMA;
Aha ni ho abaturage basabwe kongera umusaruro w’ubuhinzi kandi bakubahiriza inama bagirwa n’abashinzwe ubuhinzi.
Ubwo Minisitiri w’ubuhinzi n’ubworozi Dr. Mukeshimana Geraldine yaganirizaga abaturage bari bitabiriye itangizwa ry’igihembwe cy’ihinga, ku ngingo yo kongera umusaruro,
yagize ati: “Ntabwo turagera aho twifuza, icyo twifuza ni ukubona muri iyi misozi hahinze kijyambere hahinze neza, kuri izi hegitari 50 ntimukureho toni 300 z’umusaruro, ahubwo wenda mugakuraho toni 900.”
Dr. Mukeshimana yakomeje agira ati: “Ku rwego rw’umusaruro turacyafite intera kuko umuntu wasaruye toni eshatu, iyo aza gusarura toni esheshatu n’iyo aza kugurisha ikilo cy’ibigori ku mafaranga 150frw yari kubona amafaranga menshi cyane; (ubushize ikilo cy’ibigori cyagurishijwe ku mafaranga 200) ushobora kubona amafaranga kuko wagirishije ku giciro kiri hejuru cyane cyangwa kuko wagurishije byinshi.”
CG Gasana K. Emmanel Umuyobozi w’Intara y’Iburasirazuba avuga ko intego y’iyi ntara ari ukuba ikigega cy’Igihugu mu bikomoka mu buhinzi n’ubworozi kandi hakomeza gushyirwa imbaraga nyinshi mu kwegera abahinzi, kumva ibibazo byabo, no gufatanya n’inzego bireba kubishakira ibisubizo kugira ngo iyo ntego izagerweho.
Bamwe mu baturage b’i Rugarama MUHAZIYACU yaganiriye na bo bemeza ko hari intambwe bamaze gutera babikesha guhinga ibigori n’ubwo bagikeneye kongera umusaruro,
Irakiza Jean de Dieu ni umuhinzi w’ibigori mu gishanga cya Cyampirita, amaze imyaka irindwi ahinga .
Yagize ati:”Ubutaka bwanjye ni intambwe 50 ku 100 nakuyemo imifuka irindwi y’ibigori, uyu musaruro ni mukeya ariko turacyashaka kuwongera.”
Uwamahoro Gaudence na we ni ahinga mu gishanga cya Cyampirita yagize ati: “Mbere nahingaga imyaka ivanze, ariko aho twatangiriye guhinga igihingwa kimwe cyatoranyijwe twabonye amafaranga, muri ibi bigori dukuramo amafaranga yishyurira umugabo ishuri muri kaminuza, icyo turi kwihatira ni ukongera umusaruro.”
Nk’uko bitangazwa n’Intara y’Iburasirazuba, muri iki gihembwe cy’ihinga cya mbere cy’ihinga cya 2022A hirya no hino mu turere turindwi tuyigize hazahingwa ibihingwa byatoranyijwe birimo: Ibigori, ibishyimbo, soya, umuceri, imyumbati, ku buso busaga ibihumbi 240.
