Abahinzi bo hirya no hino mu Gihugu bahawe imashini zihinga kugira ngo badakererwa ihinga muri iki gihembwe cya 2020B.
Ikigo gishinzwe guteza imbere ubuhinzi n’ubworozi mu Rwanda -RAB kigaragaza ko hirya no hino mu Rwanda hari kwifashishwa imashini zihinga zigera ku 113 zirimo izacyo n’izo cyakodesheje n’abikorera.
Mu Karere ka Kirehe mu Mirenge ya Mpanga na Nasho izi mashini zirahingira abaturage ubuso bwa hegitari 80 ku buntu, buzahingwamo ibihingwa byiganjemo ibishyimbo na soya.
Koperative COVAMIS (Cooperative for Valorization of Mpanga Irrigation Scheme) ihinga ku buso bwa hegitari 412 mu Murenge wa Mpanga, ni imwe mu ziri mu bukererwe bw’igihinga kuko hari hegitari 50 zitari zihinze mbere yo kubona imashini.
Semikore Damascène Uyobora COVAMIS yabwiye Muhaziyacu.rw ko imashini ebyiri zihinga zabagezeho mu mpera z’icyumweru gishize zaje zikenewe.
Ati: “ Hari aho twari twarateye ariko habaho gukererwa guhinga muri 2020B, ku mpamvu zirimo kuba twarakerewe gusarura ibigori habaho n’imvura nyinshi ku buryo hari hegitari 50 zigomba guhingwa. Ariko ubu kuva kuwa gatanu, kugeza uyu munsi ku wa mbere izi mashini zimaze guhinga hegitari 20. Twizeye ko bitarenze tariki eshanu z’ukwa kane tuzaba twamaze gutera imbuto hose.”
Ibihingwa byahinzwe muri COVAMIS birimo ibishyimbo, soya, ibigori, amashaza n’inyana.
Nyirinkindi Jean Damascène undi muhinzi w’i Mpanga yagize ati: “Mpinga kuri hegitari eshatu ariko iyo izi mashini zitaza imwe nari kuzayiraza. Turashimira Leta pe, bari kuduhingira ku buntu, mu gihe twari tugiye kurara ihinga. Ubu imashini ziratunganya ubutaka, natwe turi inyuma dutera.”
Ubuyobozi bw’ishami ry’ubuhinzi n’ubworozi mu Karere ka Kirehe bwabwiye Muhaziyacu ko muri iki gihembwe k’ihinga cya 2020B, biteganyijwe ko hirya no hino mu mirenge 12 igize Kirehe ibishyimbo bihingwa kuri hegitari zisaga ibihumbi 20, hegitari zigera kuri 300 zigahingwaho soya.
Dr. Karangwa Patrick Umuyobozi mukuru w’ikigo gishinzwe guteza imbere ubuhinzi n’ubworozi mu Rwanda -RAB avuga ko guha abahinzi imashini ngo zihutishe ihinga biri mu mujyo wo kugira ngo n’ubuso bwose buhingwa buhingwe.
Ati: “Muri iki gihembwe k’ihinga twafashe ingamba, turashaka yuko umusaruro uzamuka kubera yuko ibi bihe bigoye bya Corona Virus, biragira ingaruka ku bukungu, turashaka ko abahinzi bahinga kurusha uko bahingaga mbere, bahinge ubuso bwose.”
Dr.Karangwa asobanura ko izi mashini zihinga zirimo iz’ikigo RAB n’izindi cyakodesheje n’abikorera, by’umwihariko bikorwa kuko n’uburyo bwajyaga bukoreshwa bwo gushyira abahinzi benshi mu murima butemewe iki gihe cy’Icyorezo cya COVID-19.
Agaragaza kandi ko muri rusange hirya no hino mu gihugu ubuso buhingwa 90% bwamaze gutegurwa, n’ubuso busaga 80% bukaba baramaze guterwaho imbuto; abasigaye bakiri inyuma bakaba ari bo bari gufashwa.
Mu Ntara y’Iburasirazuba abahinzi bohererejwe imashini zihinga barimo abo mu turere twa Nyagatare, Kayonza na Kirehe.
