Ikipe y’umupira w’amaguru ya Sunrise FC ikinira mu Ntara y’Iburasirazuba mu Karere ka Nyagatare kuri stade yataziriwe akazina ka Gorogota, yahize kwihimura ku ikipe ya Police FC yabatsinze mu mukino ubanza wa shampiyona, umutoza akavuga ko bamufatiranye ataramenyera shampiyona y’u Rwanda.
Kuri uyu wa gatandatu nibwo imikino yo kwishyura muri shampiyona y’icyiciro cya mbere mu mupira w’amaguru mu Rwanda iributangire, ikipe ya Sunrise izakina kuri iki cyumweru tariki 5 Mutarama n’ikipe ya Police FC yabatsinze ibitego 3-2 mu mukino ubanza.
Nyuma y’umukino ubanza umutoza wa Sunrise, Moses Basena yabwiye itangazamakuru ko Police FC yamufatiranye ataramenyera neza shampiyona, avuga ko mu mikino yo kwishyura aribwo bazakina umukino mwiza kandi bakayihimuraho.
Visi Perezida wa Sunrise FC, Mwebazi William yabwiye muhaziyacu.rw ko biteguye neza ndetse abakinnyi nta kirarane na kimwe babafitiye.
Yagize ati: “Twiteguye neza, umutoza wacu amaze kumenyera shampiyona ntabwo akimeze nka mbere tugitangira, natwe rero turiteguye, twongeyemo ingufu, abakinnyi nta birarane tubafitiye kandi nta nubwo dufite ibibazo by’imvune mu ikipe yacu.”
William yasabye abafana gukomeza kuba inyuma y’ikipe nayo igakomeza kubaha ibyishimo.
Imikino ibanza ya shampiyona yarangiye ikipe ya Sunrise iri ku mwanya wa cyenda n’amanota 19, yarangiye kandi ifite rutahizamu Samson Babua uri muri babiri batsinze ibitego byinshi.
Muri iyi mikino yo kwishyura igiye gutangira Sunrise yongeyemo abakinnyi babiri barimo Ndatimana Robert bakuye mu ikipe ya Gicumbi FC ndetse na Kyiza Ibrahim.
Uko imikino ya shampiyona iteganyijwe; Kuri uyu wa gatandatu APR FC irakina na AS Kigali, Heroes FC yakire Bugesera FC, Kiyovu irakira Etincelles FC NAHO Espoir FC yakire Mukura FC.
Kucyumweru tariki 5 Mutarama; Gicumbi izakira Marine FC, Musanze FC yakire AS Muhanga, Sunrise yakire Police FC naho Rayon Sport icakirane na Gasogi United.
