Abakinnyi 25 bahoze bakinira ikipe ya Kirehe FC n’umutoza wabo Sogonya Hamis bishyize hamwe bandikira umuyobozi w’Intara y’Iburasirazuba Mufulukye Fred bamusaba kubishyuriza ikipe ya Kirehe FC bashinja kubambura arenga miliyoni 16 Frw.
Ni ibaruwa yasinyweho na Munyeshyaka Gilbert ariko akavuga ko ahagarariye abandi bakinnyi 25 n’umutoza wahoze abatoza, aba bakinnyi bavuga ko bishyuza iyi kipe amafaranga arimo imishahara n’amafaranga yibanze ahabwa umukinnyi mbere yo gusinyira ikipe bakoreye mu myaka itatu ishize ubwo Kirehe FC yabarizwaga mu cyiciro cya mbere.
Mu kiganiro gito yagiranye na MUHAZIYACU, Munyeshyaka Gilbert, yavuze ko amafaranga bishyuza bayakoreye mu myaka itatu bamaze bakinira muri iyi kipe bamwe ikajya ibishyura ibice ikabasigaramo andi mafaranga.
Yavuze ko bagerageje kwishyuza aya mafaranga mu buryo ubwo aribwo bwose ariko abayobora iyi kipe bakabananiza cyane bitwaje ko ubwo bakiniraga iyi kipe ngo yari itarabona ubuzima gatoza.
Ati “ Mu kwezi gushize twarabandikiye badusubiza bifashishije umunyamategeko batubwira ko nta masezerano dufitanye n’ikipe yabo ngo ikipe twakiniye nta buzima gatozi yari ifite, umuyobozi mushya w’iyi kipe Sebikwekwe ntabwo aba ashaka kumva ikibazo cyacu.”
Yakomeje avuga ko kuri ubu bifuza koabayobozi b’Akarere ka Kirehe basoza manda yabo nibura bakemuye ikibazo cyabo ari nayo mpamvu bandikiye umuyobozi w’Intara y’Iburasirazuba ngo abafashe mu kurenganurwa.
Muri iyo baruwa bandikiye Guverineri Mufulukye hari aho bagira bati “ Bwana Muyobozi ideni ryacu ringana na miliyoni 16 823 200 Frw tukaba tubasaba ubuvugizi ngo Kirehe FC itwishyure, kuko aho twafashe amadeni twabaye abambuzi mu maso yabi, ikipe yatumye abavandimwe n’inshuti badutakariza icyizere kuko bumva ko umutungo w’urugo twawusesaguye nyamara ari ikipe idukenesheje bigeze aha.”
Munyeshyaka kandi yavuze ko bifuza gukemura iki kibazo mu buryo bw’ubwumvikane ngo kuko ibimenyetso bigaragaza ko bakiniye iyi kipe bihari birimo amafoto, imikino bakinnye ndetse n’amasezerano bagiranye n’iyi kipe.
Iyi baruwa bakaba bayanditse kuri uyu wa kabiri tariki ya 5 Mutarama 2021 ikaba iherekejwe n’urutonde ruriho abakinnyi 25 n’umutoza wabo n’amafaranga buri umwe yishyuza iyi kipe.
