Urubyiruko rwo mu mirenge ya Gishari na Munyiginya rurasaba ko rwakubakirwa inzu y’urubyiruko izaba ari ihuriro ryo kuruhuza no kwidagadura bagura impano zabo.
Ubwo hasozwaga ubukangurambaga bumaze amezi abiri bwigishaga urubyiruko rwari ruri mu biruhuko kwirinda ubwandu bushya bwa virusi itera Sida, kuri uyu wa 04 Ukwakira ku kibuga cy’umupira ahazwi nko ku Kiyenzi mu Murenge wa Munyiginya niho hashorejwe ibikorwa by’ubu bukangurambaga.
Ni ibikorwa byaranzwe n’imyidagaduro harimo imbyino gakondo, izigezweho, imivugo ndetse habaye n’umukino w’umupira w’amaguru wahuje Umurenge wa Munyiginya n’uwa Gishari aho warangiye hatsinze Umurenge wa Munyiginya kuri penariti 3 kuri 2.
Bamwe mu rubyiruko bari bitabiriye ibi bikorwa bemeza ko bakeneye aho bahurira nk’urubyiruko kugira ngo barusheho gusabana no kwagura impano zabo nk’uko bivugwa na Nsanzimana Theophile ukurikiye itsinda ribyina injyana zigezweho ryo mu murenge wa Gishari ryitwa “Birungi”.
Nsanzimana yagize ati: “Dukeneye ikigo duhuriramo nk’urubyiruko, rukisanzura hakaba umwanya wo kwagura impano zacu, kuko nk’aya matsinda yacu usanga akora ibintu byinshi harimo za comedies, imideri, gukina amafilime, kuvuga imivugo no kwiga kubyina ibi byose kubikora biratugora kuko ntabwo biba byoroshye guhuza urwo rubyiruko rwose rufite izo mpano zitandukanye.”
Urubyiruko rwo mu Murenge wa Munyiginya narwo rwifuza ko iyi nyubako ishyizwe hafi yarwo byarufasha kwagura impano zabo nk’uko bisobanurwa na Habimana Jean Pierre.
Yagize ati: “Inaha nta hantu ho kwidagadurira hahari, ntaho wabona kandi buriya hari nk’icyo kigo n’ubuyobozi byabworohera kuko hari nk’ubutumwa bashaka kugeza ku rubyiruko byakwihuta, hari izindi gahunda bashaka ko bakora babasha kurubonera hamwe kandi ku buryo bwihuse cyane.”
Umuyobozi w’Akarere ka Rwamagana Mbonyumuvunyi Radjab yemeza ko hari ibiri gukorwa kugira ngo urubyiruko rubashe kubona aho rwidagadurira.
Yagize ati: “Hari ibyo twashyize mu nshingano zacu, ni ukubaka ibibuga by’umupira n’ubwo nta sitade tugira ariko kubaka ibibuga bishobora guhuriraho urubyiruko bakaba bakina imikino itandukanye bakaba bakwidagadura, bagahurira hamwe ari benshi bakigishwa umuco n’indangagaciro na kirazira.”
Ati: “Ibyo byose biri muri gahunda.”
Meya Mbonyumuvunyi yakomeje asobanura by’umwihariko ibijyanye n’ibigo by’urubyiruko, kuri ubu Akarere ka Rwamagana gafite ibigo by’urubyiruko bitatu harimo icya Fumbwe, icya Kitazigurwa n’icya Rwamagana.
Yagize ati: “Duteganya ko tuzagenda tubyagura, nko muri iki gihe cya vuba turateganya gufungura ikigo cy’urubyiruko mu Murenge wa Nzige, ibi byose turabikora bijyana no gushyiraho amashuri y’ubumenyingiro kuko nk’aha Munyiginya ntayo twagiraga ariko ubu ryaratangiye.”
Mu ntego rusange z’Inama y’Igihugu y’urubyiruko harimo ko byibuze muri buri murenge hakwiye kuba hari ikigo cy’urubyiruko, nyamara ngo kuba iyi ntego itaragerwaho biterwa n’ikibazo cy’amikoro dore ko kugeza ubu mu Karere ka Rwamagana habarurwa ibigo bitatu gusa by’urubyiruko, kandi hakenewe ibigo 14.
