Mu mpera z’umwaka wa 2019 mu gihugu cy’Ubushinwa, mu burasirazuba bw’umugabane wa Aziya, hadutse icyorezo cya Coronavirus cyahawe izina rya COVID-19.
Iki cyorezo gikomeje gukwirakwira ku muvuduko wo hejuru, kimaze kugera mu bihugu byinshi byo ku Isi, gusa ntikiragera mu Rwanda no mu bihugu byinshi bigize umugabane wa Afurika.
Leta y’u Rwanda ikomeje gushyira ingufu mu kurwanya iki cyorezo, hashyirwaho ingamba zitandukanye cyane cyane zijyanye no gukaza isuku.
Abantu bagirwa inama yo kwirinda kuramukanya mu biganza no guhoberana, ndetse bakanasabwa gukaraba mu ntoki inshuro nyinshi ku munsi mu rwego rwo kwirinda kwandura iyi ndwara no kuyikwirakwiza.
Mu ifoto yafashwe kuri uyu wa gatatu tariki ya 11 Werurwe 2020, ubwo Perezida Paul Kagame yifatanyaga n’umunyemari w’umunyamerika Howard G. Buffet mu gutaha umushinga wo kuhira imyaka mu Murenge wa Nasho mu Karere ka Kirehe, mu Ntara y’Iburasirazuba; Perezida Kagame yaramukanyije n’abantu bakozanyaho inkokora, birinda gukorana mu biganza.
Iyi foto dukesha ikigo cy’igihugu cy’itangazamakuru, Perezida Kagame yaramutsaga Guverineri w’Intara y’Iburasirazuba, Mufulukye Fred.
Hirya no hino mu gihugu, ahahurira abantu benshi hashyizwe za kandagirukarabe; nk’uko bigaragara mu ifoto ya kabiri yafashwe n’umunyamakuru wa muhaziyacu.rw, abakristu gatorika batonze umurongo kuri Paruwasi ya Rwamagana, mu Ntara y’Iburasirazuba, kugira ngo bakarabe mbere yo kwinjira mu misa ya kabiri, ku cyumweru, tariki 11 Werurwe 2020.
Iki cyorezo nta kukihenjekera kuko kigeze ino cyatumara. Birasaba gukumira mbere y’uko kihagera.
Hakwiye gujorwa inspection kuko hari ibigo bya Leta byinshi, amabanki, Kaminiza ubona batubahiriza iyi Gahunda. Byaba ngombwa hagashyirwaho n’ibihano.