Abaturage bo mu Karere ka Nyagatare cyane cyane abatuye mu Murenge wa Tabagwe bavuga ko bishimira uruhare rukomeye rw’Ingabo zari iza RPA Inkotanyi zabohoye Igihugu zikagarura amahoro, ubumwe n’iterambere ry’Abanyarwanda, ibintu bavuga ko byabahinduriye imibereho ndetse bikabongerera icyizere cy’ejo hazaza.
Ibi babigarutseho kuri uyu wa 03 Nyakanga 2026 ubwo mu Karere ka Nyagatare habaga urugendo rwo kwizihiza umunsi wo kwibohora ku nshuro ya 32, rw’ibirometero 23; rwari rufite insanganyamatsiko igira iti “Intambwe mu ntego.”
Ni urugendo rwatangiriye kuri Sitade y’Akarere ka Nyagatare rusorezwa i Gikoba mu Murenge wa Tabagwe, ahari indake y’Umukuru w’Igihugu yabayemo ubwo yari ayoboye Ingabo za RPA Inkotanyi mu gihe cy’urugamba rwo kubohora Igihugu.
Guverineri w’Intara y’Iburasirazuba, Pudence Rubingisa, yavuze ko uru rugendo ari umwanya wo kuzirikana amateka Igihugu cyanyuzemo no gukomeza kubaka icyerekezo cy’iterambere Igihugu gifite.
Yagize ati: “Uru rugendo dukoze ku nshuro ya kane ni urugendo rw’amateka, ni urugendo rw’indangagaciro ndetse ni urugendo rw’icyerekezo cyane cyane ku rubyiruko kugira ngo rukomeze kwigira ku mateka y’urugamba rwo kubohora Igihugu.”
Yakomeje ashima uruhare rwa Perezida wa Repubulika Paul Kagame wayoboye urugamba rwo kubohora Igihugu no guhagarika Jenoside yakorewe Abatutsi.
Ati: “Turashimira Perezida wa Repubulika Paul Kagame wayoboye urugamba rwo kubohora Igihugu, agahagarika Jenoside ndetse akongera gushyiraho imiyoborere idaheza, igamije iterambere no guhindura imibereho y’abaturage.”
Yongeye ati: “Uyu munsi wizihijwe ku rwego rw’Intara, ariko twifuza ko umwaka utaha wazizihizwa ku rwego rw’Igihugu kugira ngo amateka ya Tabagwe n’uruhare rwaho mu rugamba rwo kubohora Igihugu bikomeze kumenyekana kurushaho.”
Bamwe mu baturage baganiriye na MUHAZIYACU bavuga ko kuba Igihugu cyarabohowe byabahesheje uburenganzira busesuye, amahoro n’umutekano byatumye bongera kugira icyizere cyo kubaho no kwiteza imbere.
Twajamahoro Faustin utuye mu Murenge wa Tabagwe, Akagari ka Shonga yagize ati: “Turashimira ingabo zacu zarwanye urugamba kugira ngo Igihugu cyacu kibohorwe. Ni ibyishimo kuri twe cyane cyane nk’abatuye muri uyu murenge ufite amateka akomeye mu rugamba rwo kubohora Igihugu.”
Mukandayisenga Domithille na we yagize ati: “Ndashimira cyane Ingabo za RPA Inkotanyi kuko zatumye umuturage yongera kugira ijambo n’ubwisanzure. Ubu umuntu araryama agasinzira neza kubera umutekano usesuye dufite.”
Uru rugendo rwitabiriwe n’abantu batandukanye basaga 4000 bavuye mu turere tugize Intara y’Iburasirazuba ndetse no mu Mujyi wa Kigali, muri bo 90% bari urubyiruko.
