Abaturage bo mu Mudugudu wa Rugarama mu Kagari ka Rwimitereri mu Murenge wa Murambi biyemeje gukorera hamwe no kwigira, bemeza ko intwaro bafite ikomeye mu kwiteza imbere ari uguhuza imbaraga n’ibitekerezo.
Umudugudu wa Rugarama utuwe n’abaturage 834, batuye mu ngo 159, muri uyu mudugudu buri rugo rufite itungo, kuko buri rugo usangamo nibura rimwe muri aya matungo inka, ihene cyangwa ingurube.
Muri uyu mudugudu ingo zidafite inzu zubakishijwe sima zose zirakurungiye, buri rugo rufite ibiti bitatu by’imbuto ziribwa, ikimoteri, kandagira ukarabe; n’umusarane n’ubwogero kandi bikoreye neza.
Bitewe n’uko abaturage bari muri uyu Mudugudu wa Rugarama batanganya ubushobozi habayeho igikorwa cyo guhuza imbaraga no gukorera hamwe, mu rwego rwo kuzamurana.
Ni umudugudu utagira amashanyarazi n’amazi meza, nyamara buri rugo rufite uburyo bwo gufata amazi aturuka ku bisenge by’inzu.
Kayitesi Emmerance ni umwe mu batuye Rugarama uvuga ko ibyo bagezeho byose babikesha ubumwe bafitanye.
Yakomeje agira ati: “Hari abaturage tugira batishoboye, turabafasha natwe ibyo dukoze tukabibakorera tukabafasha.”
Nyagahinga Eric utuye Rugarama akomoza ku mpamvu ituma uyu mudugudu wabo uba intangarugero mu Karere ka Gatsibo,
Yagize ati: “Umudugudu wacu washyizeho amabwiriza ntarengwa, uje kuwuturamo wese abanza kuyasobanurirwa, aha hatuye abantu benshi hari n’abakodsha ariko buri wse afite imyumvire myiza, imbaraga zacu ziri mu kwishyira hamwe no guhuza imyumvire.”
Sengonga Jean Marie Vianney ni Umuyobozi w’Umudugudu wa Rugarama yemeza ko imbaraga bazishyize cyane mu guhindura imyimvure y’abaturage, babereka ko bakwiye kwigira, ibibazo byose bafite bakishakamo ibisubizo ubundi bufasha bwose bwaza bukaba ari inyongezo.
Yakomeje agira ati: “Twaricaye tuganira ku bibazo dufite hanyuma dushaka umuti, icyo twabonye ni uko mu bibazo twari dufite mu kubikemura nta mbaraga zo hanze twari dukeneye, ni ibintu twifitemo twebwe ubwacu ni na yo mpamvu ibyo byose byakozwe nta muterankunga n’umwe urimo.”
Ubuyobozi bw’ Akarere ka Gatsibo buvuga ko ibyakozwe n’abaturage bo mu Rugarama ari ikimenyetso cyiza cy’uko n’ahandi bishoboka ko abaturage bakwishakamo ibisubizo bashingiye ku byo bafite, ibi byatumye ibikorwa by’uyu mudugudu byaragizwe intangarugero mu karere kose ndetse hagakorwayo urugendoshuri.
