Abaturage bo mu Murenge wa Kiziguro bigishijwe uburyo bushya bwo gufata amazi avuye ku bisenge by’inzu banahabwa ibigega bishya, ku buryo ubu batanga ubuhamya bw’uko batakirwara indwara zikomoka ku mwanda.
Ubusanzwe gahunda yo gufata amazi avuye ku gisenge cy’inzu irasanzwe ariko iri kwigishwa abaturage bo muri Kiziguro yo itandukanye n’izindi.
Aya mazi mbere y’uko agera mu kigega cyagenwe, aba yayunguruwe mu buryo bw’umwimerere, hakoreshejwe imicanga y’amoko atandukanye n’amabuye mato, hagati y’umureko uva ku gisenge n’umwenge ujya mu kigega niho hari ubu buryo bwo kuyungurura amazi.
Abubatse iki kigega bavuga ko uvomye ayo mazi wayanywa nta kibazo kuko imyanda yose iba yayunguruwe igashiramo.
Kimwe mu bigega umunyamakuru wa MUHAZIYACU yagezeho kiri mu Mudugudu wa Kabagendo, mu Kagari ka Ndatemwa cyahawe umuturage witwa Bantegeye Sarah uvuga ko ubu yaciye ukubiri no gukoresha amazi mabi.
Bantegeye tuganira hari aho yagize ati: “Ubundi twavomaga ahantu kure bitaba ibyo tukajya gusaba amazi, ariko ubu ntitukijya kuvoma buri kanya, amazi arahari kandi ayo dukoresha ni ay’imvura.”
Kuva aho Bantegeye aboneye amazi meza ngo n’abaturanyi be ntibakigira ikibazo cy’umwanda, nk’uko abigarukaho ati: “Akenshi abantu barwaraga indwara z’umwanda z’inzoka bitewe n’uko twakoreshaga amazi atari meza, ubu ushatse ayo kunywa araza akavoma akagenda”
Kimwe na bagenzi be bandi bahawe ibi bigega, biyemeje kubifata neza bakabyubakira neza kugira ngo bitazasenyuka.
Iki gikorwa cyo gutoza abaturage gufata amazi yo ku nzu no kubakira ibigega cyatewe inkunga n’umuryango Plan International Rwanda ibicishije mu rugaga Imbaraga, ni muri gahunda igenerwa abaturage batishoboye bari mu cyiciro cya mbere cy’Ubudeh bafashwa kwigira hashingiwe ku mahirwe y’ibibari hafi.
Umuyobozi wa Plan International Rwanda ishami rya Gatsibo Bakundukize Jacques yabwiye MUHAZIYACU ko bahisemo ubu buryo bw’ibigega bitandukanye n’ibindi kuko bidahenze dore ko byibuze ikiega kimwe kirangira kibatwaye amafaranga ibihumbi 80 y’u Rwanda.
Yakomeje agira ati: “Ubu twahereye ku miryango 200, twizeye ko ari igikorwa kizagera no ku bandi ariko duhereye kuri ba bandi bafite ubushobozi bucye, tugatanga n’inyigisho ku bafite ubushobozi bakaba babasha kubyikorera.”
