Perezida w’Inteko ishinga amategeko umutwe w’Abadepite Kazarwa Gerturde yifatanyije n’abaturage bo mu Murenge wa Rwinkwavu mu kwizihiza umunsi mukuru wo Kwibohora, ahanatashywe inzu eshanu zatujwemo imiryango 10 itishoboye.
Kuri uyu wa 04 Nyakanga, hizihijwe ku nshuro ya 32 umunsi wo Kwibohora, wahujwe no gutaha bimwe mu bikorwa byakozwe n’Ingabo z’Igihugu (RDF) na Polisi y’Igihugu (RNP) mu gihe cy’amezi atatu, byari bigamije guteza imbere imibereho n’iterambere ry’abaturage kandi impande zombi zigafatanya kurwanya ibyaha.
Nyuma yo gusura bamwe mu baturage batujwe muri izi nzu ahazwi nko mu mudugudu w’abasirikare, uyu mudugudu utuwemo n’abamugaye abenshi muri bo bakaba abamugariye ku rugamba rwo kuhohora Igihugu.
Mu ijambo rye, Perezida w’inteko ishinga amategeko umutwe w’Abadepite Kazarwa Gerturde yasobanuye ko ibi bikorwa ari kimwe mu bimenyetso bigaragaza imibanire myiza n’ubufatanye bw’inzego z’umutekano n’abaturage, yakomeje agira ati: “Mu rugendo turimo rwo kubaka iterambere rirambye twese twemera ko umutekano utagarukira gusa ku kuba nta ntambara iri mu Gihugu.”
Yakomeje avuga ko kugira umutekano bisobanuye ko nta cyahungabanya ituze ry’Umunyarwanda aho cyava hose n’uko cyaba giteye kose, ati: “Kumva utekanye ni ukuba ufite amahoro muri wowe ufite icyizere n’agaciro ukwiye mu Gihugu cyawe, bityo bikaba ari inshingano za buri wese gukomeza gusigasira no kurinda ibyagezweho ku nyungu z’abariho none n’ejo hazaza.”
Mukamugisha Olive ni umwe mu baturage batujwe muri izi nzu, nyuma yo kwishimira ko abonye aho atura dore ko yivugira ko yahoraga ashakisha aho aba kuko nta bushobozi yari afite, yakomeje agira ati: “Ndashimira Perezida Kagame kuko yantuje ahantu heza, ndashima ubuyobozi bwa Polisi n’ingabo bafatanyije kunyubakira inzu.”
Bimwe mu bikorwa byakozwe mu Ntara y’Iburasirazuba ku bufatanye bw’Ingabo z’Igihugu na Polisi birimo inzu 5 (2in1)zatujwemo imiryango 10, amatungo arimo inka 6 n’ihene 762 muri Kayonza na Kirehe, muri Kirehe mu Murenge wa Nasho hatanzwe imashini 10 zifashishwa mu kuhira imyaka, naho muri Nyamugari hari ivomero ry’amazi meza rizafasha abaturage bo mu tugari tubiri kugerwaho n’amazi; hari kandi abaturage babarirwa mu bihumbi bavuwe n’inzobere zavuye muri RDF na RNP indwara zitandukanye.
Ibi bikorwa byasojwe ni gahunda ngarukamwaka ihuriweho n’Ingabo na Polisi bifasha abaturage mu bikorwa bigamije kubafasha kurwanya ibibazo bibugarije mu mibereho yabo kandi bikorwa hategurwa kwizihiza umunsi mukuru wo Kwibohora.
