Mu Karere ka Kayonza mu murenge wa Nyamirama habereye ibirori byo kwizihiza umunsi mpuzamahanga wahariwe umwana w’umunyafurika, ibirori byahujwe no kuremera bamwe mu bangavu babyaye imburagihe.
Buri tariki ya 16 Kamena hazirikanwa abana b’abanyeshuri bishwe ubwo bari mu myigaragambyo mu Gihugu cya Afurika y’epfo mu mwaka wa 1976. Kuva mu mwaka wa 1991 iyi tariki yagizwe mpuzamahanga yo kuzirikana umwana w’Umunyafurika.
Mu Karere ka Kayonza uyu munsi wizihirijwe mu Kagari ka Shyogo mu kibuga cy’ahitwa mu Kiyanja. Ni ibirori byaranzwe n’imikino y’abana yagarukaga cyane ku burenganzira bw’umwana.
Bamwe mu bana b’abangavu babyaye imburagihe bemeza ko umwana watwaye inda akiri muto akenshi ababyeyi bamujujumbya, nk’uko umwe mu baganiriye na MUHAZIYACU ufite imyaka 17, we akaba yarabyaye umwana ubu wujuje amezi 10 abivuga.
Ati: “Uburenganzira bw’umwana buvugwa kandi hatubahirizwa ubwacu ni ubuhe? Iyo ubyaye uri umwana w’umukobwa ntawukwitaho, hari n’abatorongera bakagenda kubera ko iwabo babajujubije”
Umuhire Christine ni umwe mu babyeyi utuye mu Murenge wa Nyamirama yagize ati: “Umwana watewe inda akeneye ihumure kuko na we aba akiri umwana ukeneye kurerwa.”
Umuyobozi w’Akarere ka Kayonza Nyemazi John Bosco yemeza ko kurengera uburenganzira bw’umwana ari inshingano za buri wese.
Yakomeje agira ati: “Izi gahunda zo kurengera abana ntabwo twazishobora ababyeyi batabigizemo uruhare, dukeneye ubufatanye n’ababyeyi n’ubuyobozi kugira ngo ibibazo bibangamiye uburenganzira bw’abana bikemuke.”
Meya Nyemazi avuga ko mu rwego rwo kurengera abana biyemeje no gukorana n’abanyamadini n’amatorero ndetse n’imiryango nterankunga.
Mu Karere ka Kayonza habarurwa abangavu babyaye imburagihe 167 aba ni abo mu mwaka wa 2021, naho 133 ni abatarasubira mu ishuri kugeza ubu. Muri uyu muhango hari amarero ane yahawe ibikoresho, naho abana babyaye imburagihe bahabwa ibikoresho by’isuku n’ibyo mu gikoni.
