Mu makipe atatu aturuka mu Ntara y’Iburasirazuba abiri ntiyahiriwe n’umukino ubanza w’Igikombe cy’Amahoro kuko yatsinzwe, indi imwe yo yatsindiye hanze biyihesha amahirwe yo kuzakomeza mu kindi cyiciro.
Ikipe ya APR FC yatsinze Etoile de l’Est igitego kimwe ku busa, cyabonetse ku munota wa 94 habura umunota umwe ngo umupira urangire. Ni umukino ikipe ya Etoile de l’Est yari yakaniye cyane dore ko iri mu zihagaze neza mu cyiciro cya kabiri, igice cya mbere cyarangiye amakipe yombi anganya ubusa ku busa ndetse ubona ko yose yahushije uburyo bugaragara.
Igice cya kabiri ikipe ya APR FC yaje yakaniye cyane isatira izamu bikomeye abarimo Nshuti Innocent na Manishimwe Djabel na Byiringiro Lague bahusha uburyo bwinshi bwakavuyemo igitego. Ku munota wa 94 nibwo Manishimwe Djabel yahinduye umupira maze ushyirwa ku mutwe na Niyonzima Olivier Sefu wari winjiye mu kibuga asimbuye APR iba ibonye intsinzi y’igitego kimwe ku busa.
Ibi byatumye iyi kipe izajya i Ngoma ku kibuga cya Etoile de l’Est gukina umukino wo kwishyura nibura izigamye igitego kimwe.
Abakinnyi babanjemo ku mpande zombie, APR FC: Ntwari Fiacre, Buregeya Prince, Mutsinzi Ange, Nshimiyimana Yunusu, Manishimwe Emmanuel, Bukuru Christopher, Nshimiyimana Mohammed, Manishimwe Djabel, Byiringiro Lague, Ishimwe Kevin na Nshuti Innocent
Etoile de l’Est: Mfashingabo Didier, Niyonkuru Daniel, Niyibizi Emmanuel, Iradukunda Pacifique, Bugingo Jean Pierre, Rutayisire Amani, Rurangirwa Pacifique, Niyonkuru Aboubakar, Niyonkuru Ramadhan, Kagabo JMV na Iraguha Hadji.
Uko imikino yose yagenze
Mukura yatsinze Bugesera ibitego 2-1, As Muhanga itsinda Interforce FC 5-0, Gorilla FC yatsinze Marine FC ibitego 3-1 Espoir FC itsindwa na Sunrise FC igitego kimwe ku busa naho Musanze FC itsinda Police FC igitego kimwe ku busa.
Biteganyijwe ko imikino yo kwishyura izaba tariki 11 na 12 Gashyantare. Igikombe cy’Amahoro cy’umwaka ushize cyatwawe n’ikipe ya AS Kigali itsinze Kiyovu Sports ku mukino wa nyuma.
