Mu kugaragaza ubukana bw’ubwiyongere bw’Icyorezo cya Covid-19, Ubuyobozi bw’Ibitaro by’Intara bya Rwamagana bwatangaje ko kuri ubu mu Karere ka Rwamagana hari abarwayi 234 barwaye COVID-19 bari mu ngo, mu bitaro hakaba abarwayi 10 barembye.
Ni ibyatangarijwe mu kiganiro cyibanze kuri gahunda ya Guma mu rugo n’izindi ngamba zo kurwanya Covid-19 cyanyunze kuri Radio Izuba mu gitondo cyo kuri uyu wa Gatandatu, tariki 17 Nyakanga 2021.
Uyu munsi ni nabwo hatangijwe gahunda ya Guma mu rugo ireba bo mu turere tubiri two mu Ntara y’Iburasirazuba twa Rwamagana na Nyagatare, Umujyi wa Kigali n’abo mu turere twa Burera, Gisumbi, Musanze, Kamonyi, Rubavu na Rutsiro.
Mu kugaragaza uburyo Icyorezo cya Covid-19 gihangayikishije n’uburyo Abanyarwamagana bugarjwe by’umwihariko, Dr. Utumatwishima Jean Nepo Abudallah Uyobora Ibitaro by’intara bya Rwamagana,
Yagize ati: ”Mu karere ka Rwamagana ari abaturage basaga 200 barwariye Covid-19 mu rugo, kandi Covid-19 yatweretse ko umuturage umwe uyirwaye ashobora kwanduza abandi baturage batandatu icyarimwe. Kugira ngo umenye rero ibyago (risk) dufite uko bingana, fata abaturage 230 ukube gatandatu, igihe tubarekuye ngo bajye guhura n’abandi bantu.”
Imibare igaragazwa kugeza mugitondo cyo kuri uyu wa 17 Nyakanga, igaragaza ko Karere ka Rwamagana hari abantu 234 barwariye Covid-19 mu ngo. Mu mirenge 14 igize aka karere irimo abarwaye benshi ni uwa Kigabiro urimo 50, Muhazi ufite abarwaye 40, Gishari 23, Muyumbu 19, na Fumbwe 17.
Dr. Utumatwishima akomoza ku barembye n’icyo buri muntu akeneweho mu guhashya iki cyorezo, yakomeje agira ati: “Mu bitaro dufite abaturage 10 barembye, harimo batandatu bari ku mwuka, icyumvikana rero turasaba kandi dukomeje kubona ko abaturage babikora, nitwubahirize izi ngamba, twizeye yuko iyi mibare iri bugabanuke kandi tugatsinda; tukaba twava muri Guma mu rugo mu minsi 10.”
Mu basaga 230 barwariye Covid-19 mu ngo mu Karere ka Rwamagana ngo harimo n’ abakozi batandatu b’ibitaro by’Intara bayanduriye mu kazi, Ubuyobozi bw’Ibitaro bukavuga ko hashimwa umusanzu wabo kandi barakomeza kwitabwaho kugeza bakize nk’uko n’abandi barwariye mu ngo bari gukurikiranirwa hafi n’abakora mu nzego z’ubuzima barimo n’Abajyanama b’ubuzima.
Umuyobozi w’Akarere ka Rwamagana Mbonyumuvunyi Radjab, yasabye buri wese kubahiriza amabwiriza yashyizweho uko ari, no kwirinda gukorera ku jisho, kugira ngo iyi Guma mu rugo itange umusaruro.
Ati: “Byaba bibabaje ko wajya guhaha ugahaha ibiribwa ukazana na Covid-19, rwose tuributsa abaturage yuko kwirinda biruta kwivuza. Ushobora gukwepa Meya, ushobora gukwepa Umupolisi, Dasso, Youth Volunteers,…ariko ntabwo ushobora gukwepa Corona, twababwira rero ngo abantu ni bareke gukorera ku jisho.”
Mu ntwaro z’ibanze zisubirwamo kenshi zo kwirinda kwandura Icyorezo cya Covid-19 kigiye kumara imyaka ibiri cyadutse ku isi, harimo gukaraba intoki kenshi n’amazi meza n’isabuye, kwambara neza agapfukamunwa n’amazuru no guhana intera nibura ya metero.
Mu Rwanda kimwe no hirya no hino ku isi kimwe mu byemezo bikomeye bifatwa mu rwego rwo kugabanya ikwirakwizwa rya Virusi za Corona harimo gutegeka abantu kuguma mu ngo zabo, mu gihe cy’iminsi runaka ishyirwaho.
Inama y’Abaminisitiri yateranye tariki 14 uku kwezi, ni yo yafatiwemo ibyemezo birimo gushiriraho ‘Guma mu rugo’ abo mu Mujyi wa Kigali no mu turere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro; kubera ubwiyongere budasanzwe bwa Covid-19 kuva none tariki 17 kugeza tariki 26 Nyakanga 2021.
Kuva Minisiteri y’Ubuzima itangaje ko mu Rwanda habonetse umuntu wa mbere wanduye Covid-19 tariki 14 Werurwe mu mwaka w’ 2020, kugeza ubu abantu imaze gutangaza ko bayanduye basaga 52,550 muri bo harimo abavuwe barayikira, icyakora kuri ubu hirya no hino mu Rwanda abakiyirwaye basaga 14,710; mu gihe abahitanywe nayo bagera kuri 626.
