Inzego z’umutekano zikorera mu Karere ka Kayonza mu Murenge wa Ndego, zafashe abaturage 11 bagiye gutorokera mu gihugu cya Tanzania aho ngo bari bahunze inkingo za COVID-19
Aba baturage bafatiwe mu Murenge wa Kabare mu Kagari ka Karambi mu Mudugudu wa Munini bakaba bafashwe mu ijoro ryakeye bagiye kunyura mu nzira y’amazi ngo bajye mu gihugu cya Tanzania.
Karuranga Léo ni Umunyamabanga Nshingwabikorwa w’Umurenge wa Kabare ubwo yaganiraga na MUHAZIYACU, yavuze ko abo baturage bari bamaze iminsi bajya kubareba mu ngo zabo bakabihisha. Avuga ko batunguwe no kumva babafatiye mu Murenge wa Ndego bari batorotse
Ati: “Tumaze iminsi dushaka kubaganiriza ariko abenshi twajyaga mu ngo zabo tukababura, abafashwe bakomoka mu miryango ibiri abandi ni abana babo.”
Uyu muyobozi yavuze ko nyuma yo gufatwa banapimwe iki cyorezo bagasangamo umwe wamaze kucyandura, yavuze ko kandi nyuma yo kuganirizwa n’Ubuyobozi bwa Ndego, bose bemeye kugaruka mu ngo zabo no kwikingiza COVID-19
Mu minsi ishize mu Murenge wa Ndego habarurwaga abaturage 145 bari baranze kwikingiza.
Ubuyobozi buvuga ko nyuma yo kubahuza n’abandi bayobozi b’amadini atandukanye abenshi bemeye kwikingiza, bakaba bari basigaranye abagera kuri 12 na bo bagishakisha kugira ngo babaganirize barebe ko bakwikingiza.
Abenshi mu banga kwikingiza baba bavuga ko inkingo ari ikimenyetso cya Satani ngo ndetse byagiye bihanurwa muri Bibiliya.
Guverineri CG Gasana aherutse kuvuga ko hari abaturage 2000 bari baranze kwikingiza begerewe n’ubuyobozi bukabaganiriza bakemera kwikingiza.Yanavuze ko hari abarenga 115 bari bamaze gufatirwa ku mipaka itandukanye bahunga kwikingiza COVID-19.
