Igikorwa cyo gushakisha imibiri y’abazize Jenoside yakorewe Abatutsi bajugunywe mu cyuzi giherereye hagati y’imirenge ya Ruramira na Nyamirama mu Karere ka Kayonza byasubukuwe kuri uyu wa mbere, tariki 8 Kamena.
Ibi bibaye nyuma y’uko imvura ibaye nyinshi muri Gicurasi ikabangamira iyi gahunda yatangiye byimbitse muri Mata.
Kuri uyu wa mbere mu isubukurwa ry’iki gikorwa, habonetse imibiri itatu y’abazize Jenoside yakorewe Abatutsi, yiyongera kuri 218 yari imaze kuboneka ubwo ibikorwa byasubikwaga muri Gicurasi. Kugeza ubu imibiri yose imaze kuhaboneka ikaba igeze kuri 221.
Mbere, hari habayeho kwifashisha imashini zicukura, zihanga umuyoboro amazi yari mu cyuzi anyuramo, kugira ngo icyuzi gikame. Gusa kubera imvura yakomeje kwiyongera hari aho byageze biba ngombwa ko baba boroheje ikagabanyuka.
Umunyamabanga Nshingwabikorwa w’Umurenge wa Ruramira, Gatanazi Longin, yabwiye MUHAZIYACU ko ibikorwa byari byasubitswe hamaze gukurwamo abantu 218.
Kubera icyorezo cya Covid-19 kitararangira, Gatanazi avuga ko bagerageza kwifashisha abaturage bake mu muganda, kugira ngo hubahirizwe gahunda yo kwirinda.
Yagize ati: “Mu nkengero zose za ‘damu’ twarahashakiye, ubu aho turi gushakira ni ahantu hasi, cya gihe mu kwa kane dutangira hari hari isayo, ubu hamaze gukamuka.”
Ubu ni ho bari gushakishiriza, ariko hari n’ahandi ku ruhande hari amazi, Ikigo cy’Igihugu gishinzwe Ubuhinzi n’Ubworozi (RAB) kiri kubafasha kuhakamura naho kugira ngo bazabashe kuhashakira imibiri.
Gitifu Gatanazi yongeyeho ati: “Ahantu dusigaje rwose bikabije byaba ari ibyumweru bibiri, ariko ubundi twihaye icyumweru kimwe kugira ngo tube tuharangije.”
Icyuzi cya Ruramira, benshi bajya bita kuri “barrage” (baraje), cyacukuwe n’Abashinwa mu myaka ya za 1970 hagamijwe kuhira igishanga cy’umuceri.
Muri Jenoside yakorewe Abatutsi muri 1994, iyi baraje yari hagati ya Komini Kayonza na Kabarondo yajugunywemo imirambo y’Abatutsi bari bamaze kwicwa, gusa hari n’abagiye bajugunywamo bakiri bazima, ku buryo bukekwa ko hajugunywemo abantu basaga 2500.
Abenshi muri bo babaga baturutse mu bice bitandukanye bigize Perefegitura ya Kibungo, cyane cyane Komini Kabarondo, Kayonza, Komini Rutonde ari yo Rwamagana y’uyu munsi, ndetse n’ahandi.
