Mu Karere ka Rwamagana mu Murenge wa Kigabiro hari Urugo Mbonezamikurire rwa Cyanya, rwahereye ku ishuri ry’incuke ryigiraga munsi y’igiti, ubuhamya butangwa n’abarimu n’ababyeyi barereraga muri iri shuri bugaragaza ibibazo bikomeye bahuraga nabyo.
Mukarugwiza Alexiane afite abana b’impanga barererwa mu Rugo Mbonezamikurire rwa Cyanya riri mu Kagari ka Cyanya, mu Mudugudu wa Bigabiro, ni umwe mu bayeyi bari bafite abana bigiye munsi y’igiti,
Yagize ati: “Urugendo tugezeho ubu rwaratunejeje nk’ababyeyi, abana bigiraga munsi y’igiti nyuma baza kuduha ishuri ryo kwigiramo abana bakiga bacucitse.”
Uru rugo Mbonzamikorere rwa Cyanya kuri ubu rufite amashuri atatu yigirwamo n’abana 145 bafite imyaka itatu kugeza ku myaka itandatu.
Ababyeyi barera muri uru rugo bavuga ko ibihe baciyemo bitari byoroshye Mutesi Aisha, yagize ati:”Nta hantu twagiraga dusiga abana bacu icyo gihe, n’ubwo ishuri ryigiraga munsi y’igiti twaremeraga tukoherezayo abana bacu, byari ukubura uko tugira.”
Ubuhamya butangwa n’umwe mu batangiranye n’iri shuri ry’incuke, ni Uwamahoro Marie Claire na n’ubu yigisha inshuke, yemeza ko batangiye nta bikoresho bifatika bagiraga abana bakigira munsi y’igiti imvura yagwa bakajya kugama mu nzu z’abaturanyi,
Yakomeje agira ati: “Icyari kigoye cyane ntabwo twari dufite aho dufashiriza aba bana, naho baduhereye ishuri naryo ntiryari rimeze neza, ariko abayobozi babibonye baduha ubufasha batwubakira amashuri abiri, kubera ubushake twari dufite twayinjiyemo ataruzura neza dukomeza gufasha aba bana.”
Rwamuhama Mbonyingabo Faradji ni Umuyobozi w’Urugo Mbonezamikurire rwa Cyanya, avuga ko bafite intego yo gufasha abana bo mu miryango itishoboye,
Agira ati: “Turashima abantu batandukanye bagiye badufasha bakatwubakira ikindi cyumba cya gatatu navuga nka Foundation EET, Woodman Familly, Rotary Club, Jeef Gasana wadufashije akaduha intebe n’ameza biciye muri Tiani’s ltd, Mugisha Emmanuel yatwishyuriye umwarimu, turashima kandi Famille ya Gatete Marie Rose ni we waduhuje n’aba baterankunga, ntitwabura kandi gushima ubuyobozi bwacu bw’akarere bwaduhaye aho dukorera, batwubakira amashuri abiri”
Umuyobozi w’Akarere ka Rwamagana Mbonyumuvunyi Radjab avuga ko gahunda yo kubaka ingo mbonezamikurire z’abana bato (ECD) iyo ikozwe n’abaturage yorohereza inzego z’ibanze mu kongera ibikorwaremezo aho abana babona serivisi mbonezamikurire kandi hafi, kuzigama ingengo y’imari yari buzahatangwe na Leta igakoreshwa ibindi nabyo bifitiye inyungu abaturage, guhamya no kongera ikigero cyiza cy’imyumvire kuri gahunda Leta ishishikariza abaturage
Meya Mbonyumuvunyi yakomje agira ati: “ECD ya Kigabiro ndetse na Sovu byahawe ingengo y’imali ingana na Miliyoni zirenga gato 10 ngo imirimo yo kuyubaka irangire ndetse hagurwe n’ibikoresho kuko byagaragaye ko abaturage bari batagifite ubushobozi bwo gusoza imirimo batangiye.”
Ubuyobozi bw’akarere bwemeza kimwe n’izindi ngo mbonezamikurire bazahabwa ibikoresho by’ibanze byunganira iby’ababyeyi bashatse cyane cyane ibifasha mu gukomeza kwirinda icyorezo cya Covid-19.
biracyaza kbs ndabona ibintu birikugana aheza