Abaturage bo mu Kagari ka Murama mu Murenge wa Nzige mu Karere ka Rwamagana baravuga ko bishimiye ishuri ry’inshuke babonye, riri gutuma abana babo biga, ariko ngo mbere ntabwo kwiga byashobokaga kuko ishuri ryari muri kilometero zigera muri enye.
Iri shuri ryiswe Murama Indatwa Nursery School ryubatswe mu Mudugudu w’Agasharu, hifashishijwe imiganda y’abaturage ndetse rinatwara amafaranga agera kuri miliyoni eshatu n’ibihumbi 185 yaturutse mu y’Ubudehe agenerwa imidugudu.
Umwe mu babyeyi witwa Mukakimenyi Epihanie afite umwana w’imyaka 5, uyu ugiye kuba umwaka wa kabiri amugejeje ku ishuri nubwo amashuri yabanje guhagarara kubera Covid-19.
Yagize ati: “Yari umwana ugitinyatinya kubera na hano mu cyaro ariko amaze kuhagera ubu ni umwana ushabutse uzi kwijyana ku bwiherero, azi kubara mu cyongereza no ku byandika; mbega iri shuri ribafitiye akamaro kuko bazajya kugera mu mashuri abanza abana basobanutse.”
Uyu mubyeyi avuga ko bibafasha nk’ababyeyi kugira indi mirimo bakora batuje iyo bazi ko abana barimo kwiga.
Undi mubyeyi witwa Nyirazuba Odette yavuze ko igitekerezo cyo gushinga iri shuri cyavuye mu bitekerezo mu nama y’abaturage, ngo bararebye basanga abana bari kuva mu mashuri abandi bakajya gutangira bakuze kuko ishuri ryabaga kure.
Yasobanuye ati: “Ishuri ryabaga mu bilometero bine, rero twabonaga abana b’incuke batagerayo turavuga tuti reka dushinge ishuri ry’abana batoya kuko ari hagati yacu.”
Habiyaremye Theoneste, ni perezida w’ababyeyi barerera mu ishuri rya Murama Indatwa Nursery School, nawe yavuze ko mbere yuko batangiza iri shuri umubare w’abata ishuri hakiri kare n’abatinda gutangira wari utangiye kwiyongera.
Yasobanuye ati: “Muri aka kagari nta shuri ribamo ribanza, by’umwihariko twahereye ku ishuri rito ngo ubushobozi uko buzagenda buzamuka turebe ko twabona ishuri ribanza, duhera kubana batoya kuko ari bo baba bafite intege nkeya ndetse badashobora kumara amsaha menshi batari kumwe n’ababyeyi.”
Ubu bafitemo abanyeshuri 40 bigira mu byumba bibiri, icyo umubyeyi asabwa ni ugutegura umwana akamwohereza afite gurude y’ikoma, ikindi atanga ni inyunganizi ya mwarimu y’amafaranga igihumbi.
Ati: “Icyo twishimira nuko guta ishuri byagabanutse ikindi umubyeyi nta mpungenge akigira zo kujyana umwana ku ishuri, iyo umwana azi kuvuga no kugenda ibyo byonyine bimwemerera ko yamujyana gutangira kw’ishuri.”
Umunyamabanga Nshingwabikorwa w’Umurenge wa Nzige Karangwa Alphonse yemeje ko amafaranga yakoreshejwe ari ayari yaragenewe imidugudu muri gahunda y’Ubudehe, gusa ngo ntibyabujije ko abaturage nabo bitabira Umuganda kugira ngo bagire uruhare mu kuyubaka.
Yagize ati: “Ariko ikintu cyose iyo kirimo amafaranga, abaturage tubasaba ko babigiramo uruhare, baterura amatafari, ariko bakagenda basimburana muri iriya midugudu, bakumva ko kiriya kintu ari icyabo, iyo ari icyabo ntabwo cyasenyuka, n’iyo gisenyutse baragisana.”
Gitifu Karangwa yongeraho ko uruhare rwa Leta ari uko iri shuri ryubatswe mu kibanza cyatanzwe n’Akarere ka Rwamagana, ikindi ngo Leta itanga amahugurwa ku barium bigisha aba bana.
Ku kinyanye n’amahugurwa Karangwa yagize ati: “Ntabwo umuturage yagenda ngo atangire kwigisha nta mahugurwa afite, uruhare rwa Leta rukomeye cyane nuko iyo politiki yo gushyiraho z’ibigo mbonezamikurire ‘ECD’ hagiyeho gahunda hajyaho n’amahugurwa, abantu rero bakajya kwigisha bafite ubumenyi runaka.”
Umurenge wa Nzige ni umwe mu mirenge 14 igize Akarere ka Rwamagana, utuwe n’abaturage 15,816, ufite ingo 4,151, ziherereye mu midugudu 29, n’utugari tune. Kuri ubu muri uyu murenge hari amashuri y’inshuke atandatu.
