Minisiteri y’Uburezi yatangaje imyanzuro y’iperereza ryakozwe ku banyeshuri bakekwagaho gukopera mu bizamini bya Leta bisoza amashuri yisumbuye by’umwaka w’amashuri wa 2025-2026, aho abanyeshuri 563 basanze barakoze uburiganya amanota yabo n’impamyabumenyi bari bahawe biteshwa agaciro.
Ibi byatangajwe mu itangazo Minisiteri y’Uburezi yasohoye ku wa 19 Ugushyingo 2026, rigaragaza ibyavuye mu isuzuma ryakozwe ku birebana n’uburiganya bwagaragaye muri ibyo bizamini.
Minisiteri y’Uburezi yatangaje ko iperereza ryakorewe abanyeshuri 1,097 bari babanje gukekwaho gukopera. Muri bo, 30 basanze batarakopeye.
Ku rundi ruhande, abandi banyeshuri 563 bakorewe isuzuma nyuma yo kujuririra imyanzuro yari yafashwe, basanga barakoze uburiganya. Ibi byatumye umubare w’abanyeshuri bose byemejwe ko bakopeye ugera kuri 1,630.
Minisiteri y’Uburezi yatangaje ko amanota y’abo banyeshuri 563 n’impamyabumenyi bari bahawe byambuwe agaciro. Ikigo Gishinzwe Ibizamini n’Ubugenzuzi bw’Amashuri (NESA) cyahawe inshingano zo kumenyesha buri munyeshuri ibireba n’icyemezo cyamufatiwe bitarenze ku wa Gatanu, tariki ya 20 Ugushyingo 2026, mbere y’uko umunsi urangira.
Iyi Minisiteri kandi yashimangiye ko ibyavuye muri iri perereza ari umwanzuro wa nyuma, bityo ko nta yandi majurira azongera kwakirwa kuri iki kibazo.
Ku banyeshuri bafatiwe iki cyemezo cyo kwamburwa agaciro k’amanota n’impamyabumenyi, Minisiteri y’Uburezi yabahaye amahirwe yo gukomeza amasomo yabo binyuze mu nzira ebyiri.
Izo ni ugusubiramo umwaka wa nyuma w’amashuri yisumbuye ku ishuri basanzwe bigaho cyangwa bakimukira ku rindi, hubahirijwe amabwiriza agenga iyakirwa ry’abanyeshuri, cyangwa kwiyandikisha gukora ibizamini bya Leta nk’abakandida bigenga, hakurikijwe amabwiriza abigenga.
Minisiteri y’Uburezi yatangaje ko izakomeza guharanira ubunyangamugayo n’ubuziranenge mu mitegurire n’imikorere y’ibizamini bya Leta, inashimangira ko izakomeza gushyira imbere ko abanyeshuri bagira amahirwe yo gukomeza amasomo yabo.







