Dr. Edouard Ngirente Minisitiri w’Intebe yatangirije ku mugaragaro mu Karere ka Nyagatare gahunda yo kubaka ibyumba by’amashuri mu rwego rwo kunoza ireme ry’uburezi.
Ni gahunda yatangirije ku ishuri ribanza rya Kabirizi, mu Murenge wa Tabagwe kuri uyu wa Gatandatu tariki ya 20 Kamena, yanaberega hirya no hino mu gihugu, kuko Minisiteri y’Uburezi itangaza ko biteganyijwe ko mu Rwanda hubakwa ibyumba by’amashuri 22,505 n’ubwiherero 31,932; kuva ubu kugeza muri Nzeri 2020.
Minisitiri w’Intebe Dr. Edouard Ngirente yavuze ko kubaka ibi byumba by’amashuri byinshi kandi mu gihe gito, bigamije gusubiza ibibazo bishingiye ku ireme ry’uburezi.
Yagize ati: “Iyo gahunda yo kubaka amashuri icyarimwe kandi menshi, abanza n’ayisumbiye, irasubiza ibibazo byinshi bishingiye ku ireme ry’uburezi.”
Yavuze ko iby’ingenzi bitatu iyi gahunda izakemura ari ukugabanya umubare w’abana biga mu ishuri rimwe kugira ngo ishuri rijyemo abana bakeya bashobora kwigishwa mwarimu agashobora kubacunga neza no kubakurikirana, bikagabanya ubucucike mu mashuri, kugabanya ingendo ndende abana bakora bajya ku mashuri no korohereza umwarimu wigisha.
Dr. Ngirente yakomeje agira ati:” Nk’uko mubizi umwarimu wigisha abana 100 mu ishuri rimwe, biramugora kurusha uwigisha 50 cyangwa 40. Muri iyi gahunda rero yo kubaka amashuri, tubizeza ko irarangira vuba mu mezi atarenze atatu, tukubaka amashuri arenze ibihumbi 10, Guverinoma y’u Rwanda yabishyizemo imbaraga nyinshi cyane kandi inzego zose turafatanyije.”
Aho yatangirije ku mugaragaro iyi gahunda yo kubaka ibyumba by’ amashuri i Nyagatare, Minisitiri w’Intebe yari kumwe n’abandi bayobozi batandukanye birimo Prof. Shyaka Anastase Minisitiri w’ubutegetsi bw’igihugu, Dr. Gerardine Mukeshimana Minisitiri w’ubuhinzi n’ubworozi, Mufulukye Fred Umuyobozi w’Intara y’Iburasirazuba; n’abandi.
Iri yubakwa ry’ibyumba by’amashuri mu Rwanda hose, Leta irishyizemo imbaraga mu gihe kuva hagati mu kwezi kwa Werurwe uyu mwaka hafunzwe amashuri mu rwego rwo kwirinda Icyorezo cya Koronavirusi-Covid19, bikaba biteganyijwe ko azongera gufungurwa muri Nzeri 2020.
Muri uko kwezi kwa Nzeri, ni nabwo Leta ifite intego y’uko ibyumba byose n’ubwiherero bishya bigomba kubakwa; byazaba byaruzuye.
