Umunyamabanga Nshingwabikorwa w’Umurenge wa Rukara Nkunzurwanda John yasobanuye iby’umufundi uherutse kumwandikira agaragaza ko yahembewe imibyizi atakoreye abamukoresha bakamwaka ayo mafaranga bamubwira ko Gitifu ashaka kuyahemba abandi bakozi.
Mu kwezi gushize nibwo hagiye hanze ibaruwa y’umufundi witwa Samusoni Paul wubakaga kuri site ya Mitungo iherereye mu Kagari ka Rukara, uyu musore yavugaga ko ari kwihishahisha ahunga Gapita mukuru witwa Nshimiyimana Charles na Mukundabantu Jean Baptiste bamuhigaga kubera amafaranga yahembwe bakayamwaka ntayatange.
Samusoni avuga ko iminsi y’ukwezi kwa munani batinze kuyihembwa bitewe n’ibura ry’ibikoresho aho bakozemo iminsi itanu gusa bajya guhembwa bagahemberwa iminsi 15 irimo iminsi icumi atakoze, ngo ba ba Gapita babiri bahise bamuha amabwiriza yuko ajya guhembwa akabazanira 35 000 Frw by’iminsi icumi atakoze.
Aba ba Gapita ngo bamubwiye ko ayo mafaranga Gitifu ayazi ngo kuko ari ayo guhemba abandi bakozi bahemberwa kuri konte ye, yakomeje avuga ko avuye guhembwa amafaranga bayamwibye, ba ba gabo bakomeza kumugendaho bamusaba kubishyura ya mafaranga, ngo yabonye bamurembeje aguza 10 000 Frw andi 10 000 Frw ayaka umugore we ariko ngo na n’ubu baracyamwaka andi agasaba gufashwa.
Umunyamabanga Nshingwabikorwa w’Umurenge wa Rukara Nkunzurwanda John aganira na MUHAZIYACU yahakanye ibyo kwaka amafaranga uyu musore ahubwo avuga ko bakurikiranye bagasanga yarabikoze agamije gusebya Umurenge nyuma yo kwirukanwa azizwa imyitwarire mibi.
Ati “ Ibaruwa ye twarayibonye turatangara cyane kuko uriya musore yari aherutse kwirukanwa azira imyitwarire mibi, imibyizi 15 yose yarayikoze ntabwo yahembewe imibyizi atakoze twaragenzuye tureba aho bandika imibyizi dusanga yose yarayikoze, ahubwo ashobora kuba yarabikoze ashaka kudusebya.”
Gitifu yakomeje avuga ko bakoresha abafundi barenga 100 iyo haba hari ikibazo nk’icyo hari kuboneka n’abandi benshi batswe amafaranga babigaragaza.
Ati “ Buri mukozi yandikirwa imibyizi aba yakoze iminsi 15 yagera bagahembwa nabajije bambwira ko iminsi yose yayikoze ari nayo yahembewe, icyamuteye kwandika kuriya nabajije bambwira ko yahagaritswe mu kazi kubera mu minsi ishize amafaranga yatinze kugera kuri konte zabo ariko twabahembye arangije agumura abakozi abagaragariza ko leta ikunda kwambura abubaka ibyumba by’amashuri birangira agize umujinya nawe ashaka kwangiza isura y’Umurenge.”
Muri uyu Murenge wa Rukara hari kubakwa ibyumba by’amashuri 84, ubwiherero 106 n’ibikoni bitandatu, ibi byose ngo bigeze kugipimo gishimishije kuburyo uyu Murenge ariwo uyoboye iyindi mu kugira ibyumba by’amashuri byenda kuzura.
