Abanyeshuri 61,602 bo mu turere turindwi tugize Intara y’Iburasirazuba batangiye ibizamini bya Leta bisoza by’ibyiciro by’amashuri yisumbuye by’umwaka w’amashuri wa 2025-2026, aho ubwitabire bwagaragaye buri hejuru mu turere twose.
Ibizamini byatangiye kuri uyu wa 15 Nyakanga 2026 bikaba biteganyijwe kurangira ku wa 24 Nyakanga 2026, nk’uko byatangajwe n’Ikigo cy’Igihugu gishinzwe Ibizamini n’Ubugenzuzi bw’Amashuri (NESA).
NESA yatangaje ko ku rwego rw’Igihugu, abakandida 258,255 ari bo bari gukora ibi bizamini mu bigo 1,746. Muri bo, 149,533 ni abo mu cyiciro rusange (O’Level), naho 108,722 ni abo mu cyiciro cya kabiri cy’amashuri yisumbuye (A’Level). Muri aba kandi harimo 879 bafite ubumuga, bateganyirijwe ubufasha n’ibikoresho byihariye kugira ngo bakore ibizamini mu buryo bungana n’abandi.
Mu Karere ka Nyagatare, abakandida 11,494 ni bo batangiye ibizamini, kakaba ari ko gafite umubare munini w’abakandida muri iyi Ntara.
Mu Karere ka Gatsibo, abakandida bakora ibizamini bya O’Level na A’Level ni 10,469, mu gihe Rwamagana ifite abakandida 9,193, bakorera ku bigo 25 byateganyijwe.
Mu Karere ka Bugesera, abakandida bose bateganyijwe ni 8,113, barimo 5,129 bo muri O’Level, 1,628 bo muri A’Level, 1,092 bo muri TVET na 264 bo muri Professional Education. Imibare igaragaza ko ubwitabire bwari hejuru cyane, aho TVET na Professional Education byagize ubwitabire bwa 100%, O’Level igira 99.53%, naho A’Level igera kuri 99.94%.
Mu Karere ka Ngoma, abakandida 7,455 batangiye ibizamini. Mu gutangiza ibi bizamini, Umuyobozi w’aka karere wungirije ushinzwe Imibereho Myiza y’Abaturage Mukayiranga Marie Gloriose yasabye abanyeshuri gukora ibizamini batuje no kwirinda gukopera.
Mu Karere ka Kirehe, abakandida 6,914 ni bo bari gukora ibizamini bya Leta.
Mu Karere ka Kayonza, abakandida bose ni 6,964, barimo 5,639 bo muri O’Level, 1,205 bo muri TVET na 129 bo muri A’Level (Professional Education). Ubuyobozi bwatangaje ko ubwitabire bwari hejuru cyane, aho O’Level yageze kuri 99.70%, TVET igera kuri 99.9%, naho A’Level igira ubwitabire bwa 100%.
