Inshuti z’umuryango n’abahumurizamutima bo mu turere twa Gatsibo na Nyagatare bakorana n’umuryango Empower Rwanda bari gusobanurirwa uburyo butanu bwihariye bufite umwihariko wo gufasha uwahohotewe yaba umugabo cyangwa umugore, mu gihe hari ubagannye.
Dore ubu buryo busobanurwa na Mbabazi Allen Umukozi wa Empower Rwanda, ubusobanuro ku buryo bwa mbere bwiswe ‘Ufunguye udafunze’ ni ni uburyo wakiriye umuntu uje akugannye ukamwereka akamwenyu kugira ngo uje akugana ashaka ko umufasha igihe yakorewe ihohoterwa, yumve yisanze kandi yishimiye uko yakiriwe.
Ubundi buryo ni ‘Shishikariza wihatiriza’, bwo gufasha uwahohotewe ko yagira umuhate wo gukomeza kukubwira ikibazo yahuye nacyo, mu mvugo ni ukumufasha kumwumva kandi kugira ngo uwahohotewe abashe kuvuga byose byamubayeho.
‘Shyigikira ntuce urubanza’ nabwo ni uburyo bw’igihe ukugannye nubwo wabona ko ari we nyirabayazana y’ihohoterwa yagiriwe sicyo gihe cyiza cyo kubimubwira ahubwo ukwiye kumutega amatwi kandi aho akeneye ubufasha, ukamufasha kububona ku buryo bwihuse; ni ukwirinda ikintu cyose cyakomeretsa uwahohotewe ushaka guca urubanza ushingiye kubyo uzi cyangwa ku byo wabonye.
Uburyo bwa 4 ni ‘Tanga amahitamo wigira inama’, buvuga ko nubwo inshuti z’umuryango zifatwa nk’abajyanama, hirindwa ikintu cyose cyatuma amahitamo ya buri wese ashingira ku mujyanama, ni ukwirinda gufata inama bwite z’umujyanama aziha uwahohotewe; ahubwo ni ukubafasha kugira amahitamo yabo.
Uburyo bwa 5 gufasha uwahohotewe mu isanamitima ni ‘Umva cyane uvuge macye’ ni uburyo bukomeye cyane muri ubu buryo butanu kuko ari bwo buhatse ubundi bwose, mu gihe hari ukuganirije n’iyo ibibazo bye waba ubizi si ngombwa kubimuvugira, si ngombwa ku umuvugira inkuru ye ahubwo umva uwahohotewe umuhe umwanya akubwire ibye.
Hari zimwe mu nshuti z’umuryango zemeza ko ubu buryo buzazifasha kurushaho kumva no gukurikira uwahohotewe,
Muhire Dieudonne ni inshuti y’umuryango mu Murenge wa Nyagatare yagize ati: “Nk’umufashamyumvire hari ubwo umenye kuvumbura ikibazo afite, hari ubwo ikibazo yari afite gishobora gukemukira iwawe bitewe n’ibiganiro mwagiranye, wamuhaye umwanya, ukamurekera amahitamo ye kugira ngo aho usanga akeneye ubufasha burenze ubushobozi bwawe ubigeze ku bandi bisumbuye cyangwa ukaba wamugeza kwa muganga.”
Mukashyaka Esperance na we ni inshuti y’umuryango yemeza ko bungukiye byinshi mu gusobanurirwa ubu buryo butanu bwo gufasha uwahohotewe, yakomeje agira ati: “Tugiye gushyira imbaraga mu kujya dutega amatwi cyane abahuye n’ihohoterwa cyangwa se ikindi kibazo cyose cyahungabanya umuryango.”
Inshuti z’umuryango n’abafashamyumvire 120 nibo bakorana n’umuryango Empower Rwanda baturuka mu mirenge ine ari yo Murambi na Kabarore yo muri Gatsibo, n’imirenge ya ya Rwimiyaga na Nyagatare yo mu karere ka Nyagatare, buri murenge ukaba ufite abafashamyumvire n’inshuti z’umuryango 30. 
