Uwahoze ari Umusenateri mu Nteko Ishinga Amategeko y’u Rwanda, Nshunguyinka Francois, wari usanzwe atuye i Gahini mu Karere ka Kayonza, yitabye Imana mu buryo butunguranye.
Senateri Nshunguyinka yabaye Senateri kuva mu mwaka wa 2003 kugeza mu mwaka wa 2011 kuri ubu akaba yari ari mu kiruhuko cy’izabukuru, yitabye Imana mu ijoro ryakeye afite imyaka 85 nyuma yo kujyanwa mu bitaro bya Gahini.
Umunyamabanga Nshingwabikorwa w’Umurenge wa Gahini, Rukeribuga Joseph aganira na MUHAZIYACU, yemeje aya makuru avuga ko yapfiriye ku bitaro bya Gahini.
Ati: “Ntabwo twamenye neza icyo yazize, ejo yiriwe mu rugo bamuca inzara yumva ngo agize imbeho yinjira mu nzu mukanya gato aba atangiye kuremba bamujyana kwa muganga ari naho yaje gupfira.”
Nshunguyinka uretse kuba Senateri yanabaye Minisitiri mu butegetsi bwa Perezida Kayibanda akaba yarabaye Minisitiri w’imirimo ya Leta n’Ingufu.
Nyuma yaho yabaye Prefe wa Cyangugu, Byumba na Gitarama umwanya yavuyeho yirukanwe ubwo yitwaga icyitso cy’Inkotanyi mu 1990.
Mu 2011 ubwo yavaga ku mwanya wo kuba Senateri yagiye mu kiruhuko cy’izabukuru akaba yiberaga mu Murenge wa Gahini aho yakoreraga ibikorwa by’ubuhinzi n’ubworozi azwi cyane muri uyu Murenge ku guhinga igihingwa cya Makadamiya ku buso bugari.
