Mu ijoro ryakeye mu Karere ka Rwamagana mu Murenge wa Munyaga, umugabo witwa Mahirane Isaie wari ufite imyaka 53 y’amavuko yakubiswe n’inkuba ahita yitaba Imana ubwo yari ari kumva ikinamico kuri radiyo Rwanda, naho abapadiri bo kuri Paruwasi ya Rwamagana bibwa imyenda n’inkweto n’abajura bitwikiriye iyi mvura.
Ibi byabaye mu mvura nyinshi yaguye muri aka Karere ndetse no hirya no hino mu gihugu yumvikanyemo inkuba nyinshi, yaguye kugeza mu rukerera rwo kuri uyu wa Gatatu tariki ya 22 Mata.
Umunyamabanga Nshingwabikorwa w’Umurenge wa Munyanga, Mukashyaka Chantal, yemereye Muhaziyacu.rw aya makuru avuga uyu mugabo yahise apfa.
Yagize ati: “ Nibyo koko nkuko mwabibonye nijoro haguye imvura nyinshi ivanze n’inkuba, muri iyo mvura rero nibwo inkuba yakubise umugabo wari uri kumwe n’umwana gusa uwo mugabo ni we wahise apfa umwana ntacyo yabaye, radiyo bumviragaho ikinamico yahise ishya. Ubu hakurikiyeho umuhango wo kumushyingura, abagize umuryango we bagiye kwemeza urupfu rwe kuko si ngombwa ko ajya gupimwa kandi icyamwishe kigaragara.”
Uyu muyobozi yakomeje asaba abaturage kuba maso muri iki gihe cy’imvura bakirinda ibintu bishobora kubakururira inkuba birimo ibicomekwa ku mashanyarazi byose, amatelefone n’ibindi byinshi.
Uretse uyu mugabo wishwe n’inkuba, kuri Paruwasi Gaturika ya Rwamagana naho muri iyi mvura yaraye iguye abajura bateye ku icumbi ry’abapadiri bahiba imyenda yabo, inkweto, amavuta yo guteka n’ibindi bintu nkenerwa bakundaga kwifashisha.
Padiri Mukuru wa Paruwasi ya Rwamagana, Jean Marie Theophile Ingabire yagize ati” Njye namenye abo bajura saa cyenda z’ijoro bari bamaze kumena ibirahure ku byumba bitanu, aho bakuyemo imyenda yacu yose n’inkweto ndetse banatwara akajerekani k’amavuta na telefone, twabatesheje bagiye kwinjira mu cyumba ndaramo bahita biruka.”
Mu minsi ishize Ikigo k’igihugu cy’iteganyagihe, Meteo Rwanda cyatangaje ko kuva tariki 17 Mata imvura iziyongera cyane mu gihugu aho izajya igwa irimo inkuba n’ umuyaga mwinshi mu bice bitandukanye.
