Akarere ka Gatsibo kemerewe inkunga y’udupfukamunwa ibihumbi bibiri tuzahabwa abaturage batishoboye mu rwego rwo kwirinda Icyorezo cya Koronavirusi.
Ni inkunga kemerewe kuri uyu wa Gatatu, tariki ya 22 Mata 2020, na Nshuti Lucy Mbabazi, Umunyarwandakazi uba mu Mujyi wa Kigali, watangarije kuri Twitter ko ashima cyane imbaraga Leta iri gushyira mu kurinda abanyarwanda icyorezo cya Koronavirusi no gutanga imirimo ku biganjemo abagore bari gukora udupfukamunwa.
Mu kiganiro Nshuti Lucy Mbabazi yagiranye na Muhaziyacu.rw yavuze ko impamvu yemereye udupfukamunwa bamwe mu batuye Akarere ka Gatsibo ari kugira ngo na we agire uruhare mu kurinda abaturage batishoboye kwandura COVID-19.
Yagize ati: “Ni abaturage barimo abamaze iminsi badakora kandi abenshi bakeneye ubufasha. Urumva niba agapfukamunwa kamwe ari amafaranga 500frw, nshoboye gufasha abanyarwanda bandi kuzibona ni byiza.”
Yongeyeho ati: “Nashatse gufasha abo mu Karere ka Gatsibo nshingiye ku kazi keza Ubuyobozi bwa ko bukora no kuba nafasha abantu bari mu cyaro. Leta iri kwitanga cyane mu kwita ku bantu barwaye COVID-19, buri kintu barakishyura, hari abakozi batanze imishahara yabo, ubwo rero ndabona abanyarwanda natwe tubishoboye twabafasha, tugafatanya kugira ngo dutere inkunga abandi banyarwanda kurwanya iyi COVID-19.”
Umuyobozi w’Akarere ka Gatsibo Gasana Richard yabwiye Muhaziyacu.rw ko bishimiye igikorwa cya Nshuti Lucy Mbabazi kandi nk’akarere biteguye gukora ibishoboka bafatanyije n’abandi bafatanyabikorwa, gufasha abaturage batishoboye kubona udupfukamunwa mu buryo butagoranye.
Yagize ati: “Twamushimiye cyane kandi inkunga yaduhaye tuzamutumikira udupfukamunwa tutugeze ku baturage batishoboye. N’abandi batishoboye tuzafatanya n’abafatanyabikorwa bacu tutubagezaho, abishoboye bazatwigurira, kandi udupfukamunwa nituboneka ku isoko duhagije tuzakora ibishoboka batubone.”
Udupfukamunwa Mbabazi Lucy yemereye Abanyagatsibo yamaze kwishyura amafaranga yo kudukora mu ruganda Gahaya links ruri muzemerewe kudukora mu Rwanda. Ubu twatangiye gukorwa ku buryo niturangira, tuzahita dushyikirizwa Akarere ka Gatsibo, na ko kakadushyikiriza abaturage.
Akarere ka Gatsibo gatuwe n’abasaga ibihumbi 400, abari mu cyiriro cya mbere cy’ ubudehe bangana 18%.
Tariki ya 18 Mata 2020, nibwo Minisiteri y’Ubuzima mu Rwanda yatangaje ko buri muturarwanda agomba kwambara agapfukamunwa aho ari hose nka bumwe mu buryo bwo gukumira ikwirakwira ry’Icyorezo cya Koronavirusi cyugarije isi.
Inganda 26 ni zo ku ikubitiro zahawe uburenganzira bwo gukora udupfumunwa kugira ngo buri munyarwanda akabone. Agapfukamunywa kamwe kakazajya kagurwa amafaranga y’u Rwanda ari hagati ya 500 n’1000.
