Imiryango 350 ituye mu Karere ka Rwamagana mu Murenge wa Muyumbu yiganjemo ikorera mu Mujyi wa Kigali mu kazi karimo ubufundi, ubuyede, ubumotari n’indi mirimo itandukanye yahawe ibiribwa mu rwego rwo kuyifasha muri ibi bihe byo kwirinda COVID-19 abaturage bose basabwe kuguma mu ngo zabo.
Ni igikorwa cyabaye kuri uyu wa Gatandatu tariki ya 18 Mata 2020 ubwo ubuyobozi bw’Akarere ka Rwamagana kubufatanye n’urugaga rw’abikorera mu Murenge wa Muyumbu ndetse n’abaturage bafashaga bamwe mu baturage badafite ibyo kurya muri ibi bihe, abo baturage bakaba bahawe isabune, ibishyimbo na kawunga.
Kuva tariki ya 14 Werurwe umuntu wa mbere agaragaweho icyorezo cya COVID-19 giterwa na Coronavirus leta afashe ingamba zo guhagarika ibikorwa byose bihuriza hamwe abantu benshi birimo amasoko, insengero n’ingendo zihuza uturere, buri muturage wese akaba yarasabwe kuguma iwe mu rugo mu rwego rwo kwirinda ikwirakwira ry’iki cyorezo.
Bamwe mu baturage bahawe ibyo kurya baganiriye na Muhaziyacu.rw bavuze ko ibyo kurya bari baraguze mu mafaranga bizigamye byari bimaze kubashirana ku buryo ngo bari basigaye batunzwe n’ibyo bahabwaga n’abaturanyi.
Nsengimana Eric wari usanzwe ari umufundi mu Mujyi wa Kigali yagize ati “ Akazi kacu karahagaze, narimbayeho mu buzima butari bwiza kandi mfite umugore n’umwana, amafaranga nari narizigamye yari amaze gushira none leta iratwibutse, bampaye ibiro birindwi by’akawunga, ibishyimbo n’isabune urumva ko umuryango wanjye ugiye kuba ubayeho neza muri ibi bihe.”
Uwanyirigira Constance ufite umugabo w’umushoferi we yagize ati “ Umugabo wanjye yakoraga ibiraka by’ubushoferi none yarahagaze, ubuzima bwari bumeze nabi cyane, kubaho byari bikomeye cyane pe, wahaga umwana amazi, ubundi tukabwirirwa tukanaburara, ubu leta iraduhembuye barakoze cyane ni ababyeyi beza.”
Umuyobozi w’urugaga rw’abikorera mu Murenge wa Muyumbu, Rutayoberana Jean Bosco yavuze ko benshi mu batuye muri uyu murenge usanga bakorera i Kigali imirimo itandukanye, bakaba barahisemo kubafasha mu rwego rwo kwishakamo ibisubizo,yavuze ko n’ubu bakegeranya ubushobozi kugira ngo ntihazagire uwicwa n’inzara muri ibi bihe byo kwirinda Coronavirus.
Umunyamabanga Nshingwabikorwa w’Umurenge wa Muyumbu, Bahati Bonny, yavuze ko muri uyu murenge bafite imiryango myinshi yagizweho ingaruka n’iyi gahunda yo kuguma mu rugo bitewe nuko benshi mu baturage bari batunzwe no gukorera Kigali akazi gatandukanye.
Ati “ Ni umurenge uri gutera imbere, harimo ahantu henshi hari kubakwa ku buryo byatumye tugira abantu benshi barimo abafundi n’abayede, dutangira kubarura twabaruye imiryango 1200 ariko kubufatanye n’abaturage twatangiye gufasha ku buryo abantu benshi babonye ibiryo nubwo bitari bihagije cyane, ubu nta bintu bidasanzwe biragaragara.”
Uyu muyobozi yakomeje avuga ko kuri ubu mu miryango 1200 yabaruwe bari bamaze gufasha 680 hakiyongeraho indi 350 yafashijwe ngo buri wese bakazamugeraho kandi n’abo bazajya babiha bigashira bazabongera ku buryo ngo nta muturage uzicwa n’inzara.
Muyumbu ni umwe mu mirenge ihana imbibi n’umujyi wa Kigali, benshi mu batuye muri uyu Murenge bakaba bakomeje kwishakamo ibisubizo bafatanyije n’ubuyobozi bw’Akarere kugira ngo batabare abaturage bagizweho ingaruka n’ibi bihe byo kwirinda ikwirakwira rya Coronavirus.
