Umuvugizi w’Urwego rw’Igihugu rw’Ubugenzacyaha (RIB), Dr. Murangira B. Thierry, yavuze ko abantu bose bafite ibyapa cyangwa ubundi buryo bwose bwamamazaga inzoga n’ibinyobwa byahagaritswe kubera kutuzuza ubuziranenge, bagomba kubikuraho mu maguru mashya kugira ngo hubahirizwe amabwiriza yatanzwe n’inzego zibishinzwe.
Yabigarutseho kuri uyu wa 4 Kanama 2026 mu kiganiro Waramutse Rwanda, aho yasobanuye ko urugamba rwo kurwanya ibinyobwa bitujuje ubuziranenge rudashobora kugerwaho n’inzego z’umutekano zonyine, ahubwo ko rusaba ubufatanye bw’inzego z’ibanze n’abaturage.
Yagize ati: “Uruhare rw’inzego z’ibanze rwo ni urwa buri gihe ariko n’uruhare rw’umuryango ni urwa ngombwa. Ntihagire ukomeza kwishora muri ibi bintu ahubwo dufatanye dutunge agatoki aho ibi binyobwa biri n’aho bashobora kubihisha.”
Dr. Murangira yavuze ko nyuma y’icyemezo cyafashwe na Rwanda FDA cyo guhagarika inganda zakoraga ibinyobwa bitujuje ubuziranenge no kubikura ku isoko, n’ibikorwa byose byo kubyamamaza bigomba guhita bihagarara.
Yagize ati: “Abamamaza bafite ibyapa bose babikureho, ubwo ikigiye gukurikira tugiye gusaba ko itegeko ryubahirizwa. Ubwo rero iryo tangazo ryamamaza rikureho, ibitangazamakuru, yaba kuri Radio cyangwa YouTube, kuraho ayo matangazo yamamaza.”
Ibi bibaye mu gihe ibikorwa byo gukura ku isoko ibinyobwa bitujuje ubuziranenge bikomeje hirya no hino mu Gihugu, nyuma y’uko Rwanda FDA ifunze inganda zirenga 100 zagaragaye zitujuje ibisabwa n’amabwiriza agenga ubuziranenge bw’ibiribwa n’ibinyobwa.
Inzego zibishinzwe zikomeje gusaba abaturage kutanywa ibyo binyobwa no gutanga amakuru ku bantu babikora cyangwa babikwirakwiza mu buryo bunyuranyije n’amategeko.
