Ubuyobozi bw’Akarere ka Kayonza bwahagaritse Umunyamabanga Nshingwabikorwa w’Umurenge wa Murundi nyuma yo kwakira ibirego bimushinja kwambura amafaranga abantu batandukanye.
Uyu muyobozi yahagaritswe mu minsi ishize ubwo hakorwaga guhindurira abanyamabanga nshingwabikorwa b’imirenge indi mirenge bayoboramo itandukanye niyo babagamo.
Hari abashyizwe mu mirenge mishya abandi bahabwa izindi nshingano zitandukanye n’akazi bakoraga, urugero ni nka Nkurunziza Pascal wari ushinzwe ubutegetsi mu Murenge wa Kabarondo wazamuwe akagirwa Umunyamabanga Nshingwabikorwa w’Umurenge wa Nyamirama.
Hari kandi Nsoro Bright wayoboraga Umurenge wa Mwiri wagizwe Umujyanama wa Komite Nyobozi y’Akarere, n’abandi batandukanye bahinduriwe imirenge.
Kuri Mutesi Jacky wari Umunyamabanga Nshingwabikorwa w’Umurenge wa Murundi we siko byagenze kuko yahawe ibaruwa imuhagarika mu kazi umurenge yayoboraga ukaba warashyizwemo undi uwuyobora.
MUHAZIYACU yamenye amakuru ko uyu mugore yarezwe na kampani ebyiri zimushinja kubambura amafaranga menshi .
Uwaduhaye amakuru yagize ati: “Hari kampani yitwa Benefactors Ltd yambuye miliyoni 74 Frw ndetse n’undi mucuruzi wo mu Karere ka Nyagatare yambuye miliyoni 100Frw, abo rero nibo bagiye kumurega ubuyobozi bufata umwanzuro wo kumuhagarika.”
Ibi byanemejwe kandi na Meya w’Akarere ka Kayonza Murenzi Jean Claude mu kiganiro yagiranye na MUHAZIYACU, yavuze ko uyu muyobozi yahagaritswe mu nshingano kugira ngo habanze hakorwe iperereza barebe koko niba ari byo.
Yavuze ko uyu muyobozi yifashishije kampani afatanyije n’umugabo we izwi nka Arise and Shine batse abantu amafaranga ariko ntibayabishyure kuri ubu akaba yahagaritswe ngo akorwego iperereza.
MUHAZIYACU yagerageje kuvugisha kumurongo wa telefone umucuruzi uvugwaho kwamburwa n’uyu muyobozi ariko ntibyadukundira.
