U Rwanda na Singapore bifite byinshi bihuje, cyane cyane kuba nta mutungo kamere ibi bihugu byombi bishingiraho, ahubwo ari bushobozi bushingiye ku baturage.
Ndetse bamwe mu bayobozi bo mu nzego z’ibanze mu Rwanda, igihugu gikubye Singapore inshuro zirenga 30 mu bunini, banashimangira ko mu Rwanda haboneka amahirwe menshi kurusha ayo iki gihugu cyo muri Aziya cyari ifite ubwo cyatangiraga urugamba rw’iterambere, bityo bakaba babona kugera ku rwego iriho bishoboka.
Singapore ni igihugu cyageze ku iterambere ryihuse mu myaka 25 nyuma y’uko kibonye ubwigenge mu mwaka wa 1965.
Umwe mu minsi y’ingenzi muri 2019 ku bayobozi bo mu turere tugize Intara y’Iburasirazuba, ni uwo bamaze mu mahugurwa yari ayobowe na Shahrill Aj, ushinzwe gutoza ibyerekeye iterambere mu kigo cyo muri Singapore cyitwa “Nu Quest Management Pte Ltd”.
Uyu munya-Singapore, yabasangije ku mateka n’ibanga by’iterambere bya Singapore.
Shahrill ni ikigo akorera bakoreye mu Rwanda guhera muri 2011, bakorana na Leta y’u Rwanda mu byerekeye amahugurwa n’ubujyanama, mu gutegura abatangiye imirimo y’ubuyobozi, no guhugura abayisanzwemo kugirango bakore inshingano zabo neza.
Imiyoborere ni ingenzi
Nk’uko Shahrill yabitangaje, ubuyobozi ni ikintu cy’ingenzi kugira ngo ikigo, itsinda cyangwa igihugu runaka bigere ku ntego yabyo.
Yasobanuye ati: “Mufite umuyobozi mwiza uyu munsi, neza neza nk’uwo Singapore yigeze kugira mu bihe byahise (Li Kuan Yew).”
Ariko kuri Shahrill, abantu bakwiye no gutekereza ku myaka izaza, mbese bagatangira kurambagiza uwazasimbura uri ku buyobozi uyu munsi, kugirango akomeze za ntego na cya cyerekezo byubatswe muri iyi myaka yose.
Usibye gukomoza ku kamaro ko gukomeza kongerera ubushobozi abari mu mirimo yo gufasha abaturage gutera imbere, Shahrill agaruka ku kamaro ko gukorera hamwe.
Yemeza ko mbere yo kugirango umuyobozi ashakashake intego ze bwite, igikwiye ari ugushakashaka inyungu rusange, bityo n’ize akazigeraho mu buryo bworoshye kandi burambye.
Yakomeje ati: “Mu Rwanda hari abayobozi bafite umuhate n’ubushake. Icyo nabibutsa ni ugukomeza bagana imbere, ntibigere na rimwe babura intego itumye baba mu myanya barimo. Bari mu myanya barimo kugirango bakorere abaturage, bakorere umuryango mugari, bawugeze ku iterambere ryiza ndetse n’ejo hazaza heza.”
Nk’umuntu uri hafi kumara imyaka icumi mu gihugu, Shahrill avuga ko yagiye abona impinduka nyinshi z’iterambere.
Nyuma y’aya mahugurwa, Umuyobozi w’Akarere ka Bugesera, Mutabazi Richard, yatangaje ati: “Akenshi usanga umuntu ashaka guhindura ibintu binini ariko atabanje guhindura udutoya tumwegereye.”
Yongeyeho ati: “Mu byo twize by’ingenzi harimo kubanza kwisuzuma ubwawe, ukareba neza niba nta kibazo ufite, nibwo ubasha guhindura undi ukwegereye.”
Umuyobozi w’Intara y’Iburasirazuba, Mufulukye Fred, yavuze ko Singapore ijya kugira amateka asa nk’ay’u Rwanda; cyane cyane kuba buri kimwe muri ibi bihugu ari kimwe mu bito cyane mu ngano ku mugabane wacyo, ndetse byombi bikaba byaraciye mu by’ubukoloni.
Guverineri Mufulukye yagize ati: “Hari igihe cyageze abantu batekereza ko u Rwanda rutazongera kuba igihugu ukundi, ariko kuva icyo gihe, aho tugeze tubikesha ubuyobozi bwiza, mu gihe Singapore ishingiye ku muyobozi nka Li Kuan Yew, urugendo rw’iterambere rw’u Rwanda rwayobowe na Perezida Kagame.”
Uyu muyobozi yavuze ko gukunda igihugu, gukora cyane no gukorera hamwe ari indangagaciro abayobozi bakwiye guhurizaho kugirango bazamure abaturage.
Mufulukye kandi avuga ko urebye aho u Rwanda rwavuye mu myaka 25 ishize n’aho ruri none, ari ikimenyetso cy’uko rimwe u Rwanda rwazagera aho Singapore yageze mu iterambere.
Umurage wa Lee Kuan Yew
Iki gihugu kigendera ku murage wa Lee Kuan Yew, umukambwe watabarutse muri 2015 amaze imyaka 91 ku isi, akaba afatwa nk’umubyeyi wa Singapore, nyuma y’aho ayibereye minisitiri w’intebe imyaka 30 kugeza muri 1990.
Nk’igihugu kitari gifite umutungo kamere, Lee yashyizeho umurongo ukomeye wo kurwanya ruswa mu bayobozi, ikintu yemezaga ko kidindiza imiyoborere n’iterambere.
Umuyobozi ahembwa umushahara wo hejuru cyane kugirango atazatekereza kwaka ruswa maze umuturage akabihomberamo.
Gusa kuba umuyobozi ntibyoroshye kuko bisaba igihe kugirango babanze babone ko ashoboye, hakubitiyeho n’imyaka abanza kuba umuyobozi w’agateganyo bakabanza bakamenya ko ashoboye koko.
Umuyobozi kandi atoranywa kare, ndetse uyu munsi bazi uzasimbura minisitiri w’intebe uri ku buyobozi.
Urugendo rwa Singapore
Shahrill atanga urugero rw’umuntu aramutse ashyizwe rwagati mu ishyamba ry’inzitane, nta kintu na kimwe ahawe cy’ubufasha, akabaza niba uwo muntu yarokoka.
Yasubije ati” “Yego rwose wabaho. Kubera ko ikiremwa muntu gifite ubushobozi bwo kwishakira inzira; kubera kugotwa n’ibibazo, nta n’ikintu ufite, uzatekereza uburyo wava muri ayo makuba.”
Ibi nibyo byabaye kuri Singapore, nkuko Shahrill abisobanura avuga ko iyo igihugu cye kitisanga mu mbogamizi kitari gutekereza cyane uko cyakwigobotora maze ngo kinatere izindi ntambwe.
Imyaka 10 y’ibanze mu burezi ku mwana ni itegeko, kandi byabaye ihame, ukoze icyaha cyo kwima umwana uburenganzira bwo kwiga arahanwa bikomeye.
Ati: “Umubyeyi agomba kujyana umwana we ku ishuri, iyo atabikoze atyo nta mpamvu, ajyanwa mu rukiko, ndetse no gufungwa biba bishoboka.”
Buri muturage wese aba ari umusirikare watojwe nubwo aba akora indi mirimo, inshingano aba agomba gukora ni ukujya ku rugerero (mu gisirikare) nibura ibyumweru bitatu buri mwaka.
Nubwo Singapore ifite ubuso bwa kirometero kare 721.5, harimo ubwo yabonye imaze gukamya amazi yo mu nyanja iyikikije maze ihahindura ubutaka bwo kubakaho.
Mu myubakire, hari inyubako ndende, ariko bubatse no munsi y’ubutaka, ariko no hejuru ya za nyubako hakaba hajya ibindi bikorwa nk’imihanda, ibibuga, n’ibindi.
Ubundi Singapore yahoze ari igihugu gikoronizwa n’Ubwongereza, ariko mu Ntambara ya Kabiri y’Isi muri za 1940, cyahise kijya mu maboko y’Ubuyapani, gusa nyuma y’iyi ntambara, Ubwongereza bwahise bucyisubiza kugeza mu mwaka wa 1963.
Singapore yabonye ubwigenge kuwa 9 Kanama 1965, nyuma y’aho imaze imyaka ibiri ibarwa nk’agace kagize igihugu cya Malaysia.
Mu myaka ya za 1990, iki gihugu cyari kimaze kuba kimwe mu bihugu bikize ku isi, giteza imbere cyane uburezi n’inganda.
Uyu munsi, nk’uko Shahrill abitangaza, 95% by’abaturage b’iki gihugu batunze inzu, ikigo cy’iki gihugu gitwara abantu mu ndege ni kimwe mu bikomeye ku isi, ubuvuzi bwabo ni ubwa mbere mu karere, n’igisirikare ni kimwe mu bikomeye muri Aziya.
Yagize ati: “Kaminuza zose dufite ziri mu 100 zikomeye ku isi, ndetse n’ishuri ryigisha ubucuruzi ryacu ni rimwe muri eshatu za mbere ku isi.”
Singapore yabaye igicumbi cy’ubucuruzi ku rwego rw’isi, kuburyo ngo n’ubwo nta mabuye y’agaciro cyangwa peteroli bagira, ibigo bikomeye muri buno bucuruzi ku isi byose nabyo bihagira icyicaro.
Ku itariki ya 12 Kamena 2018, Singapore yakiriye inama yahuje Perezida wa Koreya y’Amajyaruguru Kim Jong-un n’uwa Leta Zunze Ubumwe za Amerika, Donald Trump.
Iyi nama idasanzwe mu mateka y’isi yabereye muri Capella Hotel, ahitwa Sentosa, yaje no kwitwa akazina ka “Singapore Summit”; ibi benshi babisobanura nk’intsinzi kuri Singapore.
