Mu isozwa ry’amahugurwa y’imboni z’umutekano mu mudugudu uzira icyaha zatoranyijwe yari amaze icyumweru abera mu Karere ka Gatsibo, Ubuyobozi bwasabye abahuguwe gukorana umurava ibyo bize bubizeza ubufatanye mu kuzuza inshingano zabo.
Kuri uyu wa mbere Ukwakira, mu Murenge wa Kabarore nibwo hasojwe amahugurwa y’imboni z’umutekano 179 mu mudugudu uzira icyaha. Yasojwe n’umunyamabanga wa Leta muri minisiteri y’ubutabera akaba n’imboni ya guverinoma mu Karere ka Gatsibo Nyirahabimana Solina wibukije abarangije aya mahugurwa ko bakwiye kuba intangarugero,
Yakomeje agira ati “Turabizeza ubufatanye n’inzego zose, kugira ngo ibyo mwiyemeje muzabigereho neza, muri Intore nyazo mu buryo bwo gukunda Igihugu bwo hejuru kandi aho muba mukumiriye icyaha, ibi namwe muzabyishimira mu myaka iri imbere ubwo muzabona ibyaha birimo kugabanyuka kubera yuko mwabigizemo uruhare.”
MUHAZIYACU yaganiriye na bamwe bamwe mu bahawe aya mahugurwa yihariye yo kugira umudugudu uzira icyaha, bemeza ko hari ibyaha byihariye bagiye guhagurukira, Umutesi Sarah ni uwo mu Murenge wa Kiziguro,
Yagize ati: “Icyo twigiye hano ni ukurinda umutekano ukamenya ikintu cyose cyawuhungabanya n’aho gituruka, ibyaha byibasiye iwacu harimo icyaha cyo gutera abangavu inda, ubujura, tugiye gukora ubukangurambaga twigishe abaturage ibyo tuvuyemo kugira ngo basobanukirwe uko bakwiye kugira umudugudu uzira icyaha.”
Habiyambere Celestin Saleh ni uwo mu Murenge wa Gitoki, yemeza ko nabo ibyaha bafite byihariye biza ku isonga biri mu bwoko butatu, icya mbere ni icyo gusambanya abana, icya kabiri ni amakimbirane mu muryango ndetse n’icyaha cyo gukubita no gukomeretsa;
Inzira yo kurwanya ibi byaha ayivuga muri aya magambo, ati: “Intego ni ukuzamura imyumvire y’abahohoterwa kugira ngo amenye ko hari uburenganzira bwe afite, bityo na we abashe kurwanya cya cyaha, ikindi ni ukuzamura imyumvire y’abaturage kugira ngo batarebera ukora icyaha, ahubwo bakamutangaho amakuru; ibyaha tukabikumirwa bitaraba.”
Izi mboni z’umudugudu uzira icyaha zahuguwe zigishijwe uburyo bwo gukora icyumba ntangamakuru kizaba kiri mu kagari, kigakusanyirizwamo amakuru yose arebana n’ibyaha n’ibibazo byugarije umudugudu, herekanwa n’ingamba zo kubirwanya, Iki cyumbu kizajya kifashishwa buri gihe, izi mboni z’umudugudu Kandi zigiye guhugura bagenzi babo basigaye mu mudugudu.
Indi nkuru wasoma:
