Umwangavu witwa Bayisenge wabyaye imburagihe, akabyara abana babiri b’impanga kandi avuka mu muryango ukennye mu Murenge wa Rukara, Akarere ka Kayonza; ubu avuga ko yabonye isomo ryo gutwara inda akiri muto ku buryo ntawe yakwemerera kongera kumushaka.
Bayisenge Chantal ni umwangavu wabyaye impanga atari yageza imyaka 18 y’ubukure, ubu ubayeho mu buzima bugoye, kubona ibyo kurya birakomeye,kwambara na byo ni uko,
Ubwo yasurwaga n’Umuryango Learn Work Develop (LWD) kuri uyu Gatandatu tariki 02 Ukwakira bamuhaye ibikenerwa by’ibanze harimo ibyo kurya ,umufariso, imyambaro ye n’umwana ,amabase n’ibindi bikoresho by’isuku.
Bayisenge avuga ko yabonye isomo ryo gutwara inda y’imburagihe,
Yakomeje agira ati: “Ubuzima mbayemo bwampaye isomo, kubona ibyo turya nibyo twambara biragoye, noneho ukongeraho abana babiri ntibyoroshye, ariko ubu nafashe icyemezo cy’uko ntawuzongera kunshuka ngo yongere kuntera inda na none.”
Iki gikorwa cyari kitabiriwe n’abantu batandukanye harimo n’Umunyamabanga Nshingwabikorwa w’Umurenge wa Rukara Nyirabizeyimana Immaculée yemeza ko bagiye gukomeza gukurikirana uyu mwana.
Umuryango LWD si uyu mwana wenyine ufashije nk’uko byemezwa n’Umuyobozi wawo Mwiseneza Jean Claude, avuga ko umugenerwabikorwa wese ubyaye LWD imusura ikamuremera.
Yakomeje agira ati: “Tuzakomeza kubakurikiranira hafi, cyane ko icya mbere tubakorera ari ukubigisha imyuga no gukunda umurimo kugira ngo na bo babone uko biteza imbere n’imiryango yabo.”
Ibi biri muri gahunda y’Umushinga “Masenge mba Hafi” ufasha cyane aba bana b’abakobwa babyara inda z’imburagihe. Mu murenge wa Rukara habarurwa abana 42 bamaze gufashwa muri ubu buryo bwo kubasura bagahabwa ubufasha bwihariye bitewe n’imibereho yabo igoye barimo.
