Mu Karere ka Ngoma mu Murenge wa Jarama hatangirijwe gahunda yo kwakira ibitekerezo by’abaturage bizashyirwa mu igenamigambi ry’Akarere ry’umwaka wa 2022-2023
Minisiteri y’Ubutegetsi bw’Igihugu, ifatanyije na Minisiteri y’Imari n’Igenamigambi batangije mu Gihugu hose gahunda yo gutanga ibitekerezo
bizatoranywamo ibizinjizwa mu igenamigambi n’imihigo by’Akarere mu mwaka wa 2022/2023 no kubagaragariza aho ibyashyizwe mu igenamigambi ry’umwaka wa 2021/2022 bigeze bishyirwa mu bikorwa.
Gahunda ya Guverinoma y’imyaka 7 igamije kwihutisha iterambere (NST 1)
iteganya ko ikigero cy’uko umuturage w’u Rwanda yishimira uruhare agira mu bimukorerwa, kigomba kuba kigeze kuri 90%.
Bimwe mu bitekerezo byatanzwe n’abaturage batuye mu Murenge wa Jarama byibanze ku bikorwaremezo nk’imihanda no kongerera agaciro ibikomoka ku buhinzi, umwe muri aba baturage yagize ati: “Duhinga ibigori ariko iyo byeze tugurirwa ku giciro gito, icyo twifuza ni ukongerera agaciro ibyo duhinga tukabigurisha ku giciro cyo hejuru kuko ubu baduhenda bitwaje ko umuhanda wacu utari mwiza.”
Umunyamabanga Nshingwabikorwa w’impuzamiryango iharanira uburenganzira bwa muntu CLADHO, Dr Safari Emmanuel avuga ko nk’amashyirahamwe arengera uburenganzira bwa muntu bishimiye uruhare abaturage bahabwa, kandi bazakomeza kwigisha abaturage uruhare rwabo mu bibakorerwa.
Minisitiri w’ubutegetsi bw’Igihugu Gatabazi Jean Marie Vianney we yagize ati: “Leta y’u Rwanda ikomeje kwihutisha iterambere rirambye n’imibereho myiza y’abaturage kandi umuturage abigizemo uruhare. Leta yatangiye gukusanya ibitekerezo by’abaturage bizajya mu igenamigambi ry’umwaka wa 2022/2023, tuzaba twegereza umwaka wa 2024.”
“Turasabwa gukora cyane ngo ibyo Nyakubahwa Perezida wa Repubulika yemereye abaturage tubigereho ndetse dukomeze tunakore n’ibindi.”
Minisitiri Gatabazi yasabye buri wese kugira intego, ahereye mu rugo rwe, iterambere rikazamuka
Ibitekerezo byatanzwe bizakusanywa bihurizwe hamwe, barebe iby’ingenzi bishyirwe mu bikorwa, ibizasigara nabyo bizimurirwa umwaka uzakurikiraho
Umuyobozi w’Akarere ka Ngoma Niyonagira Nathalie mu izina ry’abaturage ba Ngoma yagaragaje ibikorwa bitandukanye byagezweho muri aka Karere, birimo kubaka hoteri, sitade, ubwanikiro bw’imyaka, amashuri; anavuga ko hubatswe imiyoboro y’amazi 675 byatumye ingo zikoresha amazi meza muri aka Karere ubu ziri ku kigereranyo cya 92% .
